Исломобод шаҳрида Ўзбекистон элчиси Алишер Тўхтаев Иқтисодий ҳамкорлик ташкилотининг Илм-фан жамғармаси билан истиқболли лойиҳаларда ҳамкорлик қилишга келишиб олди, дея хабар берди “Дунё” ахборот агентлиги.
Ўзбекистон элчиси Иқтисодий ҳамкорлик ташкилотининг Илм-фан жамғармаси (ECО Science Foundation, ECOSF) президенти Сеед Комаил Таеби билан учрашди.
Қайд этилишича, жамғарма президенти Ўзбекистон раҳбариятининг мамлакатда илм-фанни ривожлантириш ва илмий фаолиятни давлат томонидан қўллаб-қувватлаш, таълимнинг барча даражаларида инновацион ёндашувлар ва ечимларни жорий этиш, ёшларнинг ахборот технологиялари, амалий фанларга қизиқишини орттириш борасидаги қатъий сиёсати, профессионал кадрларни тайёрлаш борасидаги ташаббусларини эътироф этди.
“Биз дўст Ўзбекистоннинг ютуқларидан хурсандмиз ва бундай юқори натижалардан илҳомланяпмиз”, деган Сеед Комаил Таеби.
ECOSF раҳбари Янги Ўзбекистонда таълим ва инновациялар йўналишида ноёб тажриба яратилганини, истиқболли “Бир миллион дастурчи” лойиҳаси, Президент мактаблари, ижод ва ихтисослаштирилган таълим муассасалари фаолияти йўлга қўйилгани яқин келажакда ижобий натижалар беришига ишонч билдирди.
Учрашувда инсон капиталини ривожлантириш, илмий-маданий меросни ўрганиш, қайта тикланувчи энергия манбалари, атроф муҳитни муҳофаза қилиш ва иқлим ўзгариши, транспорт ва логистика соҳаларида қўшма тадқиқотлар ўтказиш масалалари келишиб олинди.
Изоҳ (0)