Кеча 8 ноябрь куни Тошкентда Иқтисодий ҳамкорлик ташкилотининг 16-саммити доирасидаги тадбирлар бошланди. Ташкилотга аъзо давлатлар раҳбарлари бирин-кетин Ўзбекистонга ташриф буюрди. ИҲТ бош котиби Хусрав Нозири Ўзбекистон президенти Шавкат Мирзиёев билан учрашув ўтказди. Мазкур учрашув ҳақида Хусрав Нозири қуйидаги фикрларни билдириб ўтди.
“Ташкилотимиз котибияти жойлашган Теҳрондан Тошкентга келиб, Ўзбекистон президенти муҳтарам Шавкат Мирзиёев билан учрашиш шарафига муяссар бўлдим. Учрашув Иқтисодий ҳамкорлик ташкилотига аъзо давлатларнинг навбатдаги, 16-саммити арафасида бўлиб ўтди.
Мазкур саммит илк бор Ўзбекистонда ўтказилаётгани туфайли ҳам учрашувимиз тарихий аҳамият касб этди. Шу муносабат билан мен муҳтарам Шавкат Мирзиёевни 16-саммит Тошкентда ўтказилаётгани билан самимий табрикладим. Учрашув давомида мен президентга саммитга тайёргарликнинг бориши ҳақида ҳисобот бердим. Иқтисодий ҳамкорлик ташкилоти доирасидаги минтақавий ҳамкорликнинг устувор йўналишлари юзасидан ҳам самарали фикр алмашдик.
Савдо, сармоя, транспорт, коммуникация, энергетика, фойдали қазилмалар ва атроф-муҳит, туризм, барқарор ривожланиш, инсон ресурслари, парламент ва ҳуқуқий ҳамкорлик, шунингдек, Афғонистон бўйича махсус дастуримиз доирасидаги ҳамкорлигимиз устувор йўналишлардир. Шунингдек, ташкилотимиз фаолиятида мамлакатингизнинг роли тобора ортиб бораётгани учун Ўзбекистон президентига миннатдорлик билдирдим. Ўзбекистон охирги икки йил ичида кўп нарсаларни таклиф қилди ва кўплаб янги ташаббуслар билан чиқди, бу ташаббуслар бизнинг ташкилотимизда кенг қўллаб-қувватланди. Уларнинг бир қисми ҳозирда ҳаётга татбиқ этилмоқда.
Жумладан, Ўзбекистон президентининг таклифига биноан ташкилотимиз доирасида атроф-муҳитни муҳофаза қилиш соҳасида ҳамкорлик бўйича юқори даражадаги платформа ташкил этиш бўйича тегишли қарор қабул қилинганини маълум қилдим. Биз ҳозир ушбу янги тузилманинг биринчи йиғилишини ўтказишга тайёргарлик кўряпмиз.
Шунингдек, Ўзбекистон ташкилотимиз фаолиятида илк бор ҳар бир саммит учун алоҳида мавзу белгилаш масаласини илгари сурди. Эсингизда бўлса, 2002 йилда мен раисликни ўз зиммамга олганимда, Ўзбекистон биринчи марта минтақамизда алоқаларни мустаҳкамлаш мавзусини кун тартибига олиб чиқишни таклиф қилганди.
Ўзбекистондан кейин навбат Озарбайжон раислигига етиб келди, у ҳам Ўзбекистон мисолида мавзу таклиф қилди. Мавзу яшил иқтисодиётга ўтиш ва ўзаро алоқаларни мустаҳкамлаш эди. Келаси йилнинг январидан эса раислик Эронга ўтади.
Эрон ҳам ўз мавзусини таклиф қилди.Яъни, Ўзбекистон президенти томонидан Ашхободда бўлиб ўтган аввалги 15-саммитда билдирилган ташаббус аллақачон кўз ўнгимизда анъанага айланиб бормоқда. Бу жуда яхши ва фойдали анъана.
Биз транспорт ва коммуникация масалаларига ҳам катта эътибор қаратдик, чунки бу фаолиятимизнинг муҳим йўналиши. Биз бу борада турли лойиҳалар, транспорт ва транзит лойиҳаларини амалга оширмоқдамиз. Минтақамизнинг шарқи ва ғарбини, шимол ва жанубни боғловчи йўлаклар шулар жумласидандир.
Шунингдек, ташкилот ҳудудидан Хитой ва Европа ўртасидаги савдо учун фойдаланиш мумкин. Бу масалаларнинг барчаси муҳокама қилинди ва Ўзбекистон ўзининг географик жойлашуви туфайли транспорт-коммуникация соҳасидаги бу лойиҳаларнинг барчасини амалга оширишда, албатта, жуда муҳим ўрин тутади.
Биз энергетика соҳасидаги ўзаро ҳамкорлигимиз масалаларини ҳам муҳокама қилдик. Ҳозирда иккита асосий лойиҳамиз бор. Бу Боку шаҳрида ташкилотга аъзо мамлакатларнинг барқарор ва тоза энергияга ўтишига ҳисса қўшадиган Тоза энергия марказининг яратилишидир. Шунингдек, минтақавий энергия бозорини яратиш лойиҳасини амалга оширмоқдамиз. Туризм ҳамкорлигимизнинг яна бир устувор йўналишидир. Шу муносабат билан мен Ўзбекистон президентини Шаҳрисабз шаҳри 2024 йилда ИҲТнинг туризм пойтахти этиб танлангани билан табрикладим.
Умид қиламизки, жорий йил доирасида шаҳарда нафақат Ўзбекистонда, балки ташкилотимизнинг бутун минтақасида туризм соҳасини ривожлантиришга хизмат қиладиган тегишли туризм тадбирлари ўтказилади. Биз томонларни қизиқтирган бошқа халқаро масалаларни ҳам муҳокама қилдик ва фикр алмашдик. Саммитни муваффақиятли ўтказишга келишиб олдик. Саммитда барча давлат ва ҳукумат раҳбарлари иштирок этади. Бу жуда яхши кўрсаткич ва Ўзбекистоннинг ташкилотимиздаги ўрни ва роли аъзо давлатлар томонидан юксак эътироф этилганидан далолатдир”, — деди Хусрав Нозири.
Изоҳ (0)