Islomobod shahrida O‘zbekiston elchisi Alisher To‘xtayev Iqtisodiy hamkorlik tashkilotining Ilm-fan jamg‘armasi bilan istiqbolli loyihalarda hamkorlik qilishga kelishib oldi, deya xabar berdi “Dunyo” axborot agentligi.
O‘zbekiston elchisi Iqtisodiy hamkorlik tashkilotining Ilm-fan jamg‘armasi (ECO Science Foundation, ECOSF) prezidenti Seyed Komail Tayebi bilan uchrashdi.
Qayd etilishicha, jamg‘arma prezidenti O‘zbekiston rahbariyatining mamlakatda ilm-fanni rivojlantirish va ilmiy faoliyatni davlat tomonidan qo‘llab-quvvatlash, ta’limning barcha darajalarida innovatsion yondashuvlar va yechimlarni joriy etish, yoshlarning axborot texnologiyalari, amaliy fanlarga qiziqishini orttirish borasidagi qat’iy siyosati, professional kadrlarni tayyorlash borasidagi tashabbuslarini e’tirof etdi.
“Biz do‘st O‘zbekistonning yutuqlaridan xursandmiz va bunday yuqori natijalardan ilhomlanyapmiz”, degan Seyed Komail Tayebi.
ECOSF rahbari Yangi O‘zbekistonda ta’lim va innovatsiyalar yo‘nalishida noyob tajriba yaratilganini, istiqbolli “Bir million dasturchi” loyihasi, Prezident maktablari, ijod va ixtisoslashtirilgan ta’lim muassasalari faoliyati yo‘lga qo‘yilgani yaqin kelajakda ijobiy natijalar berishiga ishonch bildirdi.
Uchrashuvda inson kapitalini rivojlantirish, ilmiy-madaniy merosni o‘rganish, qayta tiklanuvchi energiya manbalari, atrof muhitni muhofaza qilish va iqlim o‘zgarishi, transport va logistika sohalarida qo‘shma tadqiqotlar o‘tkazish masalalari kelishib olindi.
Izoh (0)