Душанбе шаҳрида Тожикистон—Ўзбекистон—Туркманистон—Эрон—Туркия транспорт йўлаги бўйича юқори даражадаги ишчи гуруҳнинг биринчи маслаҳат йиғилиши бўлиб ўтди. Бу ҳақда Транспорт вазирлиги хабар берди.
Қайд этилишича, Иқтисодий ҳамкорлик ташкилоти (ИҲТ) бошчилигида ўтказилган ишчи гуруҳ йиғилишида Транспорт ва логистикани ривожлантириш муаммоларини ўрганиш маркази мутахассислари иштирок этган.
ИҲТга аъзо давлатлар транспорт вазирларининг 11-йиғилишида қабул қилинган Анқара декларациясига кўра Тожикистон—Ўзбекистон—Туркманистон—Эрон—Туркия мултимодал транспорт коридорини ривожлантириш бўйича лойиҳа дастурини ишлаб чиқишга келишилган эди.
Йиғилишда юк ташишларни кўпайтириш ва савдо тартиб-қоидаларини соддалаштириш, хусусан, денгизга чиқиш имкони бўлмаган мамлакатлар учун халқаро транзитни ривожлантириш ва рағбатлантириш масалалари муҳокама қилинган.
2023 йилнинг июнида Zhejing Union of Railway Logisticс компанияси, “Ўзбекистон темирйўллари” АЖ ва “Қирғиз темирйўли” миллий компанияси давлат корхонаси ҳамкорлигида Хитой—Қирғизистон—Ўзбекистон мултимодал транспорт йўлаги орқали юк поезди ҳаракати йўлга қўйилганди.
Ўша ойда Хитойнинг Сиямен портидан Ўзбекистонга Эрон орқали контейнер поезди ҳаракати йўлга қўйилди. Юк контейнерлари Хитойдан денгиз орқали Бандер-Аббас портига олиб келинади ҳамда Эроннинг Бандер-Аббас портида темирйўл платформаларига ортилган ҳолда Туркманистон орқали Ўзбекистонга кириб келади.
Изоҳ (0)