Туркия президенти Ражаб Тоййиб Эрдўғон Тошкентда бўлиб ўтган Иқтисодий ҳамкорлик ташкилотининг (ИҲТ) 16-саммитида Ғазо секторидаги вазиятга тўхталди. Бу ҳақда Anadolu хабар берди.
Эрдўғоннинг таъкидлашича, ҳозирда блокададаги Ғазо секторида 11 мингга яқин фаластинлик, жумладан, аёллар ва болалар ҳалок бўлди, дунё эса сукут сақламоқда. У дунё жиддий муаммолар билан юзлашадиган давр келганини таъкидлади.
“Коронавирус пандемиясининг жаҳон иқтисодиёти ва савдосига етказган яралари ҳали битмаган. Кейинчалик биз қўшни ҳудудларда бошланган Россия—Украина урушининг даҳшатли оқибатларига дуч келдик.
Энергия ва озиқ-овқат нархларининг кескин ўсиши натижасида юзага келган инфляция сўнгги 60-70 йилдаги энг юқори даражага етиб, муаммоларни янада кучайтирди. Биз бу қийинчиликларга қарши самарали курашиш йўлларини излаётган бир пайтда, босиб олинган Фаластин ҳудудларида авж олган можаро юрагимизга тегди” , — деди у.
Эрдўғон 9 ноябрь ҳолатига кўра, Исроил Ғазо секторини 34-кун кетма-кет бомбардимон қилганини эслатди.
“Исроил томонидан шафқатсизларча ўлдирилган Ғазо секторининг 11 мингга яқин аҳолисининг 73 фоизи аёллар ва болалардир. Ғарб давлатларининг ҳар томонлама қўллаб-қувватлашидан баҳраманд бўлган Исроил расмийлари мактаблар, масжидлар, черковлар, шифохоналар, университетлар ва турар жой биноларини бомбардимон қилишда, барча инсоний қадриятларни оёқости қилишда давом этмоқда. Биз ҳатто болаларнинг ўлдирилишини ҳам оқлайдиган шундай фанатизмга дуч келдик”, — деди Эрдўғон.
Туркия раҳбари доимий равишда инсон ҳуқуқ ва эркинликлари, демократия ҳақида гапирадиган Ғарб давлатлари Исроил қирғинларини четдан кузатаётганини қайд этди.
“Бу давлатлар ва ташкилотлар шу қадар ожизки, улар болалар қотилларини танқид қилиш у ёқда турсин, ҳатто оташкесимга ҳам чақира олмайди. Фикр эркинлиги баҳонасида Қуръони Карим китобини ёқиб юбораётганларга кўз юмаётганлар Фаластин байроғи билан келиша олмайди. 7 октябрдан буён гувоҳи бўлган иккиюзламачилик мисоллари тобора кўпаймоқда. Воқеалар яна бир бор биз мусулмонлар бирлигимизни мустаҳкамлашимиз зарурлигини кўрсатмоқда. Биз гуманитар сулҳни таъминлаш ва можаро тарқалишининг олдини олишга қаратилган дипломатик ташаббусларимизни давом эттирамиз”, — деди Туркия раҳбари.
Бундан ташқари, Туркия раҳбари Исроил—Фаластин можаросини ҳал қилишда иштирок этиш нуқтаи назаридан ИҲТ ролига эътибор қаратди.
“500 миллион аҳолига эга, умумий даромади 1,5 триллион долларга тенг бўлган Иқтисодий ҳамкорлик ташкилоти, шубҳасиз, муҳим ўринни эгаллайди. Агар бугун биз ИҲТ, мусулмонлар сифатида овозимизни баланд кўтармасак, яна қачон баланд кўтарамиз?” — деди Туркия раҳбари.
Изоҳ (0)