Бугун, 8 ноябрь куни Тошкент шаҳрида Иқтисодий ҳамкорлик ташкилоти 5-бизнес форуми бўлиб ўтди, дея хабар берди “Дарё” мухбири. Тадбирда Озарбайжон, Эрон, Қозоғистон, Қирғизистон, Покистон, Тожикистон, Туркманистон, Туркия давлатларидан 300 нафар, Ўзбекистондан 500 нафар тадбиркор, сиёсатчи ва иқтисодчилар қатнашди.
Форум иштирокчиси, тадбиркор Анвар Абдуқаюмнинг айтишича, форум тадбиркорлар учун янги ҳамкорлар топиш имконини беради.
“Бугунги бизнес–форумдан жуда мамнунман. Унинг тадбиркорлар учун жуда катта фойдали жиҳатлари бор. Масалан, ўзим Марказий Осиё ва МДҲ давлатларига экспортни йўлга қўйганман, лекин Покистон ва Туркияга ҳали маҳсулотларимизни сотмагамиз. Бугунги форумда ушбу давлатлардан ҳам ҳамкорлар топдик. Ҳамма гап фақатгина ҳамкор эмас, балки таниш-билиш ва дўст топишда. Улар эртага ҳамкорларни бошлаб келишади. Экспорт — давлатимизнинг, тадбиркорларнинг келажаги. Тадбиркорларимиз халқаро брендга айланмоқчи бўлса, экспортга кўпроқ эътибор қаратиши керак. Айнан шундай форумлар дунёга чиқиш учун жуда муҳим. Бу каби тадбирлар қанча кўп бўлса, шунча яхши. Айниқса, унинг Ўзбекистонда ўтказилаётгани ҳам биз учун катта имконият ва ундан фойдаланиб қолишимиз керак”, — деди тадбиркор.
Форум доирасида тадбиркорлар учун ўзаро мулоқот майдони ташкил этилиб, турли соҳалар бўйича шартномалар тузиш имкони яратилди.
Маълумот учун, 2023 йилнинг январь—сентябрь ойларида Ўзбекистоннинг Иқтисодий ҳамкорлик ташкилоти давлатлари билан товар айланмаси ҳажми 9,2 миллиард долларни ташкил этди. Ташкилотга аъзо мамлакатларнинг Ўзбекистон умумий товар айланмасидаги улуши 20,5 фоиз бўлди. Бунда экспорт миқдори 4,2 миллиард доллар, импорт эса 5 миллиард (+3,3 фоиз) долларга тенг.
Ўзбекистон ташқи савдосида ИҲТ улуши 24,7 фоизни ташкил этади. Эътиборли жиҳати, 5,75 миллиард долларга тенг бўлган экспорт ҳажми 2021 йилга нисбатан 6,3 фоиз юқорилаган. Импорт 6,62 миллиард долларга (14,3 фоиз) ўсган. 2022 йилда умумий экспортнинг учдан бир қисми (29,8 фоизи) ИҲТ мамлакатлари ҳиссасига тўғри келган.
Изоҳ (0)