Иқтисодий ҳамкорлик ташкилотининг (ИҲТ) тарихи ва бу ташкилотда Ўзбекистон манфаатлари қай даражада эканлиги хусусида Ўзбекистоннинг Эрондаги элчиси, ИҲТ доимий вакили Баҳодир Абдуллаев ўз мулоҳазаларини билдириб ўтди.
“Иқтисодий ҳамкорлик ташкилоти учта мамлакат: Туркия, Эрон Ислом Республикаси ва Покистон ташаббуси билан 1985 йилда ташкил этилган. Ташкилотга 1992 йилда Марказий Осиёнинг 5 та мамлакати, жумладан, Ўзбекистон ҳам аъзо бўлиб кирган. Шу билан бир қаторда Афғонистон ва Озарбайжон ҳам қўшилган. Айни кунда минтақавий иқтисодий ташкилотга 10 та давлат аъзо.
Кўп йиллар давомида ушбу ташкилот фаолияти анча суст кечди, аммо охирги йилларда ўзаро ҳамкорлик қайтадан яна жонланаётганини кузатишимиз мумкин. Айниқса, 2017 йилдан кейин Ўзбекистоннинг ушбу ташкилот доирасида фаоллашуви, ташкилот экспертларининг билдирган фикрларига кўра ҳам, ташкилотнинг янада юксалишига сабаб бўлди. Жумладан, 2021 йилнинг ноябрь ойида Ашхобод шаҳрида бўлиб ўтган саммитда муҳтарам президентимиз томонидан 8 та амалий ташаббус илгари сурилди. Бу ташаббуслар — ўзаро савдо битимини имзолаш, юқори мартабали экспертлар платформасини ташкил этиш ва, энг муҳими, ҳар бир йилни маълум бир шиор остида ўтказиш бўлди.
2022 йилда Ўзбекистон бевосита ушбу ташкилотга раислик қилди ва “Иқтисодий ҳамкорлик ва ўзаро боғлиқликни янада мустаҳкамлаш” шиори остида ўтган эди”, — деди Баҳодир Абдуллаев.
Элчининг алоҳида таъкидлашича, Иқтисодий ҳамкорлик ташкилоти кўп қиррали платформа.
“Бунда ташкилотнинг функсионал вазифалари бор ва булардан энг асосийси — савдо-иқтисодий, транспорт-транзит, туризм, экология муаммолари ҳамда инсон ресурслари йўналишларига қаратилган.
Шундан келиб чиққан ҳолда, Ўзбекистонга ташкилотнинг қандай фойдаси бор, деган саволга шундай жавоб бериш мумкинки, авваламбор, ташкилотга аъзо мамлакатлар Ўзбекистоннинг яқин қўшнилари билан кўп томонлома дипломатия платформасидан фойдаланган ҳолда Ўзбекистон савдо, транспорт ўйналишида ўзининг ташаббусларини илгари суриши ва шу орқали ўзининг иқтисодий манфаатларини таъминлашга эришиши мумкин. Бу йўлда амалий қадамлар ташланмоқда, деб бемалол айтиш мумкин ва эртага ўтадиган саммит ташкилот тарихида жуда муҳим воқеа бўлиб хизмат қилади”, — деди Иқтисодий ҳамкорлик ташкилотининг доимий вакили.
Президент Шавкат Мирзиёев раислигида ўтадиган ИҲТ самитида иштирок этиш учун бунга қадар Қозоғистон бош вазири Алихан Смаилов ва Покистон муваққат ҳукумати раҳбари Анвар ул-Ҳақ Какар Тошкентга етиб келган.
Иқтисодий ҳамкорлик ташкилоти саммитида, шунингдек, Озарбайжон президенти Илҳом Алиев, Эрон президенти Иброҳим Раисий, Тожикистон президенти Эмомали Раҳмон, Туркманистон президенти Сердар Бердимуҳамедов, Қирғизистон президенти Садир Жапаров, Туркия президенти Ражаб Тоййиб Эрдўғон ҳамда ИҲТ бош котиби Хусрав Нозирий иштирок этади.
Кун тартибига мувофиқ, ИҲТ доирасида савдо-иқтисодий, инвестисиявий, транспорт-коммуникациявий ва гуманитар ҳамкорликни янада кенгайтириш ҳамда ушбу кўп томонлама тузилма фаолиятини такомиллаштириш масалалари кўриб чиқилади.
Изоҳ (0)