Шавкат Мирзиёев афғон халқига гуманитар ёрдам кўрсатишни кўпайтиришга чақирди

Шавкат Мирзиёев 9 ноябрь куни Иқтисодий ҳамкорлик ташкилотининг 16-саммитида Афғонистон масаласига тўхталди.

Президент саммит ташкилот аъзоларидан бири бўлган Афғонистон иштирокисиз ўтаётганига диққат қаратди.

“Асрлар давомида бизга ён қўшни бўлган кўпмиллатли Афғонистон халқини бугунги мураккаб муаммолари қаршисида ёлғиз қолдириб бўлмайди. Ушбу мамлакатни минтақавий интеграция жараёнларига фаол жалб этиш барқарор тараққиётимизнинг ажралмас ва зарурий шартидир”, — деди Шавкат Мирзиёев.

Давлат раҳбари саммида иштирок этаётган барчани афғон халқига гуманитар ёрдам кўрсатишни кўпайтиришга, ушбу мамлакатдаги ўткир ижтимоий-иқтисодий муаммоларни жамоавий масъулият ва мақбул механизмлар асосида ҳал этишга чақирди.

Шавкат Мирзиёев 3 ноябрь куни Туркий давлатлар ташкилоти саммитидаги нутқида Афғонистон халқига инсонпарварлик ёрдами кўрсатишни сусайтирмасликка чақирганди.

“Афғон халқига инсонпарварлик ёрдами кўрсатишни сусайтирмаслик, бу юртдаги ўткир ижтимоий муаммоларни ҳал этишга қаратилган аниқ механизмларни ишлаб чиқишга чақирамиз. Бизга минтақавий шериклик ва барча қўшнилари билан иқтисодий ҳамкорлик жараёнларида фаол иштирок этадиган, тинч ва барқарор Афғонистон керак”, — деган эди президент.

Ўзбекистон афғон халқига бундан буён ҳам зарур ёрдамни бериб боришини билдирганди.