Қирғизистон президенти Садир Жапаров Иқтисодий ҳамкорлик ташкилотининг 16-саммитида иштирок этиш учун 8 ноябрь куни Ўзбекистонга келди.
Ўзбекистон бош вазири матбуот котибининг хабар қилишиша, Қирғизистон раҳбари рафиқаси Айгул Жапарова ҳамроҳлигида ташриф буюрди. Олий мартабали меҳмонни Тошкент халқаро аэропортида Абдулла Арипов ва бошқа расмийлар кутиб олди. Шундан сўнг у учун ажратилган қароргоҳга жўнаб кетди.
Президент Шавкат Мирзиёев раислигида ўтадиган ИҲТ самитида иштирок этиш учун бунга қадар Қозоғистон бош вазири Алихан Смаилов ва Покистон муваққат ҳукумати раҳбари Анвар ул-Ҳақ Какар Тошкентга етиб келган.
Иқтисодий ҳамкорлик ташкилоти саммитида, шунингдек, Озарбайжон президенти Илҳом Алиев, Эрон президенти Иброҳим Раисий, Тожикистон президенти Эмомали Раҳмон, Туркманистон президенти Сердар Бердимуҳамедов, Туркия президенти Ражаб Тоййиб Эрдўғон ҳамда ИҲТ бош котиби Хусрав Нозирий иштирок этади.
Кун тартибига мувофиқ, ИҲТ доирасида савдо-иқтисодий, инвестисиявий, транспорт-коммуникациявий ва гуманитар ҳамкорликни янада кенгайтириш ҳамда ушбу кўп томонлама тузилма фаолиятини такомиллаштириш масалалари кўриб чиқилади.
Шавкат Мирзиёев, шунингдек, раҳбарлар билан икки томонлама учрашувлар ўтказади. Жумладан, 8 ноябрь куни Қирғизистон, Туркия президентлари, Покистон муваққат ҳукумати раҳбари ва ИҲТ бош котиби билан музокаралар режалаштирилган.
Иқтисодий ҳамкорлик ташкилотига 1985 йилда асос солинган, унинг доимий фаолият юритувчи котибияти Теҳрон шаҳрида жойлашган. Ўзбекистон 1992 йилдан бошлаб ушбу ташкилот аъзосидир.
Изоҳ (0)