Тошкентда ўтаётган Иқтисодий ҳамкорлик ташкилоти саммити тадбирлари доирасида 9 ноябрь куни Шавкат Мирзиёевнинг Эрон президенти Иброҳим Раисий билан учрашуви бўлиб ўтди. Бу ҳақда Президент матбуот хизмати хабар берди.
Қайд этилишича, Ўзбекистон—Эрон муносабатларини янада мустаҳкамлаш, савдо, инвестициялар, инновациялар ва транспорт соҳаларида амалий ҳамкорликни кенгайтириш масалалари муҳокама қилинган. Ўзаро мулоқотлар фаол давом этаётгани мамнуният билан қайд этилган.
.jpg)
“Икки томонлама савдода ўсиш суръати сақланиб қолмоқда, иқтисодиётнинг турли тармоқларида кооперация лойиҳалари биргаликда амалга оширилмоқда. Илгари олий даражада эришилган келишувларни тўлиқ рўёбга чиқариш масалаларига алоҳида эътибор қаратилди.
Саноат кооперацияси ва маҳаллийлаштириш, қишлоқ хўжалиги, логистикада ўзаро манфаатли ҳамкорликни кенгайтириш учун имкониятлар мавжудлиги таъкидланди”, — дейилади хабарда.
Шунингдек, Ўзбекистон ва Эрон раҳбарлари маданий-гуманитар ва илм-фан соҳасидаги алмашинувларни ривожлантириш муҳимлигини кўрсатиб ўтган. Минтақавий аҳамиятга молик масалалар, шу жумладан, Афғонистондаги бугунги вазият нуқтаи назаридан кўриб чиқилган.
Аввалроқ Эрон президенти Иброҳим Раисий рафиқаси Жамиле Аламолхода ҳамроҳлигида Тошкентга келгани тўғрисида хабар берилганди.
Шавкат Мирзиёев раислигида ўтадиган ИҲТ саммитида иштирок этиш учун бунга қадар Қозоғистон бош вазири Алихан Смаилов, Покистон бош вазири Анвар ул-Ҳақ Какар, Қирғизистон президенти Садир Жапаров, Туркия президенти Ражаб Тоййиб Эрдоғон, Озарбайжон президенти Илҳом Алиев пойтахтга етиб келгани хабар қилинган эди.
Изоҳ (0)