Бельгия Қуролли Кучлари 2025 йил охиригача қурол-яроғ харид қилиш учун 7,3 миллиард евро сарфлашни режалаштирмоқда. Бу ҳақда Бельгиянинг ЛъЭчо газетаси Мудофаа вазирлиги ҳужжатига асосланиб ёзмоқда.
Кўрсатилган маблағдан зирҳли техника харидига 4 миллиард евро, ўқ-дориларга 2,3 миллиард евро, 11 та Ф-35 қирувчи самолётига эса тахминан 1 миллиард евро йўналтирилади.
Мамлакат ҳарбий-денгиз кучлари эса, ўз навбатида, аллақачон буюртма қилинган иккита фрегатга қўшимча равишда 1,3 миллиард евролик учинчи фрегатни сотиб олмоқчи.
Таъкидланишича, Бельгия ҳукуматининг саъй-ҳаракатлари НАТО томонидан аъзо давлатлар учун белгиланган ҳарбий харажатларнинг ялпи ички маҳсулотга нисбатан 2 фоизлик мақсадли кўрсаткичига эришишга қаратилган. Шу муносабат билан мамлакатнинг ҳарбий бюджети жорий йилда 4 миллиард еврога ошиб, 12 миллиард еврога етади.
Бундан ташқари, мамлакат ҳукумати 2029 йилгача ҳарбий маълумотларни қайта ишлаш марказлари қурилишига 965 миллион евро ажратишни режалаштирмоқда. Ушбу объектлар сунъий йўлдошлар, учувчисиз учиш аппаратлари ва жанговар бўлинмаларнинг маълумотларини реал вақт режимида қайта ишлаш орқали ҳарбий операцияларда ҳал қилувчи аҳамият касб этади. Шунингдек, марказлар давлат хизматларидан олинган маълумотларни сақлаш ва хавфсиз тарзда қайта ишлаш учун ҳам фойдаланилади.
Изоҳ (0)