Шахматнинг рапид йўналиши бўйича жаҳон чемпионатида ўзбекистонликлар қандай қатнашди?

АҚШнинг Ню-Ёрк шаҳрида шахмат бўйича рапид ва блис йўналишлари бўйича жаҳон чемпионати бўлиб ўтмоқда.

Мусобақанинг учинчи куни рапид бўйича сўнгги 3 та партиялари ўйналди. Ўзбекистон терма жамоасининг етакчи гроссмейстерлари ҳам совринли ўринлар учун баҳс олиб борди. Блиц ва рапид бўйича амалдаги жаҳон чемпиони Магнус Карлсен 8-турдан кейин мусобақани тарк этганди. Шу боис, ҳар икки йўналишда ҳам янги чемпион аниқланади.

Кутилмаганда рапид баҳсларида 18 ёшли Володар Мурзин (2588) энг тажрибали рақибларини ортда қолдириб, жаҳон чемпионига айланди. FIDE байроғи остида ҳаракат қилаётган россиялик иқтидор эгаси 13 имкониятдан 10 очко жамғариб, чемпионликни қўлга киритди. Қизиқарлиси, шахматчи мусобақада 59-рақамда таснифланган эди. У сўнгги 13-турда арманистонлик Карен Григорян билан дуранг қайд этди ва бу унинг жаҳон чемпионлиги учун етарли бўлди.

Эътиборлиси, уччала совринли ўрин ҳам россиялик шахматчиларга насиб этди. Александр Гришук (2675) 9,5 очко билан иккинчи ўринни эгаллаган бўлса, шунча очкога эга Ян Непомняший (2758) қўшимча кўрсаткичларга кўра кучли учликка якун ясаб берди.

Кейинги ўриндаги олти нафар иштирокчи 9 очкодан жамғарди. Улар орасида Жавоҳир Синдоров (2655) ҳам бор. Ўзбекистонлик спортчи 11-турда Николас Теодороу билан дуранг қайд этди, 12-турда Андрей Волокитинни, сўнгги 13-турда рейтингда ўзидан анча юқорида бораётган полшалик таниқли гроссмейстер Ян-Криштоф Дудани мағлуб этди. Жавоҳирнинг совринли ўринлардан бирини эгаллаши учун ярим очко етмай қолди. Ян Непомняший билан ўзаро учрашувдаги мағлубият унга панд бериб қўйди.

Совринли ўринлар учун даъвогарлар қаторида эътироф этилган Нодирбек Абдусатторов (2740) рапид бўйича жаҳон чемпионатини кўнгилдагидек ўтказа олмади. У сўнгги кунги 3 та партиядан 2 тасида мағлубият қайд этиб, топ 10 таликдан чиқиб кетди. Нодирбек 13 имкониятдан 8 очко тўплаб, қўшимча кўрсаткичларга кўра 28-ўрин билан чекланди. Абдусатторов рапид баҳсларида 9-рақам остида таснифланган эди.

Бундан ташқари, Жаҳонгир Воҳидов 7,5 очко билан қўшимча кўрсаткичларга кўра 48, Муҳиддин Мадаминов 7 очко билан 86, Шамсиддин Воҳидов эса 5,5 очко билан 131-ўрин билан кифояланди.

Аёллар ўртасидаги мусобақа Афруза Ҳамдамова (2188) Ўзбекистон шарафини ҳимоя қилмоқда. Ёшлар ўртасида икки карра жаҳон чемпиони бўлган Афруза тарихий натижа қайд этди. У 11 имкониятдан 8 очко жамғариб, қўшимча кўрсаткичларга кўра 6-ўринни эгаллади. Афруза сўнгги кун олдидан 5,5 очко билан 15-поғонада бораётганди.

Ҳамдамова кеча тунда ўтказилган 3 та партиядан 2 тасида ғалаба, 1 тасида дуранг қайд этди. Мусобақа давомида фақат битта учрашувда имкониятни бой берди. Турнирда 83-рақам остида таснифланган Ҳамдамова учун бу ҳақиқатан ҳам тарихий натижа. Афруза 6 ғалаба, 4 дуранг ва 1 мағлубият эвазига 8 очко жамғарди.

Ўзбекистонлик шахматчи чемпион Ҳампи Конеру (Ҳиндистон, 2431) дан бор йўғи ярим очко кам тўплади. Кучли учликдан жой олган Жу Вен Жун (Хитой, 2536) ва Катерина Лагно (FIDE, 2433) билан бир хил очкога эга бўлди, аммо қўшимча кўрсаткичлар сабаб совриндорлар қаторидан жой олмади.

Афруза Ҳамдамова мусобақа давомида икки карра жаҳон чемпиони, блиц йўналишида амалдаги жаҳон чемпиони россиялик Валентина Гунина (FIDE, 2388) ни мағлуб этди. Қозоғистонлик гроссмейстер, блиц йўналишида икки карра жаҳон чемпиони Бибисара Ассаубаева (2444), россиялик жаҳон чемпиони Катерина Лагно (2433), украиналик жаҳон чемпиони Анна Музичук (2408) сингари номдор шахматчилар билан дуранг ўйнади.

АҚШ шарафини ҳимоя қилаётган Гулруҳбегим Тоҳиржонова 11 имкониятдан 5 очко жамғариб, қўшимча кўрсаткичларга кўра 65-ўрин билан кифояланди. У рапид баҳсларида 3 ғалаба, 4 дуранг ва 4 та мағлубият қайд этди. Гулруҳбегим турнирда 42-рақам остида таснифланганди.

Маълумот учун, эртага, 30 декабрь кунидан шахматнинг блиц, яъни тезкор шахмат бўйича жаҳон чемпионати бошланади.