Россия президенти Владимир Путин қозоғистонлик ҳамкасби Қосим-Жўмарт Тўқаев билан телефон орқали мулоқот қилди. Бу ҳақда Қозоғистон президенти девонхонаси хабар берди.
![](/static/2024/08/26/photo_2024-08-26_18-18-34-Xb8bkGBl.jpg)
Хабарга кўра, томонлар Россия давлат раҳбарининг Остонага давлат ташрифига тайёргарликни муҳокама қилган.
Суҳбат чоғида давлат раҳбарлари Қозоғистон-Россия ҳамкорлигининг бугунги ҳолати ва истиқболлари ҳақида фикр алмашган. Шунингдек, улар аввалроқ савдо-иқтисодий ва энергетика соҳаларида энг юқори даражада эришилган келишувларни тўлиқ амалга ошириш зарурлиги қайд этган.
Ўз навбатида Тўқаев Путинга Татаристон пойтахтида 2024 йилнинг 22—24 октябрь кунлари бўлиб ўтадиган БРИКС саммитига таклифи учун миннатдорлик билдирган.
Путин ноябрь ойида Қозоғистонга давлат ташрифи билан боришни режалаштирмоқда. У июль ойи бошида Тўқаевдан тегишли таклиф олган. Қозоғистон президенти сафарни Коллектив хавфсизлик шартномаси ташкилоти (КХШТ) Олий кенгаши мажлиси билан бирлаштиришни таклиф қилган. Путин Тўқаевга таклиф учун миннатдорлик билдирган ва бирлаштириш ғоясини “оқилона” деб атаган.
Россия президенти Қозоғистонда охирги марта 2015 йилда давлат ташрифи билан бўлган эди. Охирги расмий ташриф эса 2023 йилнинг ноябрида бўлиб ўтган. Ўшанда Путин ва Тўқаев 2024—2026 йилларга мўлжалланган ҳамкорлик режасини имзолаган эди.
Изоҳ (0)