Қашқадарё вилоятининг Ғузор туманидаги «Амир Темур» маҳалласида яшовчи фуқаролар фойдаланишга топширилганига икки йил ҳам бўлмаган намунали уйларнинг яроқсизлигидан шикоят қилди.
Аҳоли мурожаатини ўрганган «Дарё» мухбири Отабек Қўлдошевнинг маълумот беришича, 2018 йил фойдаланишга топширилган намунали уйларнинг аксариятида сув жўмраклари ишламайди. Хонадон эшикларига ўрнатилган қулф носоз ёки ишдан чиққан. Уй деворлари эса моғорлаб, тўкилиб тушмоқда.
«Янги уйга 2019 йил март ойида кўчиб кирган бўлсак, бир йилда кўплаб камчиликлари кўзга ташланиб қолди. Ювиниш хонаси учун ўрнатилган сув жўмраклари ишламайди. Ошхона деворлари моғорлаб, ўйилиб тушмоқда. Хона эшиклари қулфланмайди. Баъзиларининг қулфи бузуқ бўлса, баъзи эшиклар нотўғри ўрнатилгани боис қулфланмайди», — дейди намунали уйларда яшовчи Зарина Умирова.
Зарина Умированинг маълумот беришича, улар яшаётган уй 2018 йил фойдаланишга топширилган бўлса-да, оила 2019 йил март ойида уйга кўчиб ўтган.
«Ёмғир ёғса, дераза тагидан сув кириб уйимиз сувга тўлади. Қурилиш ташкилоти раҳбарига мурожаат қилавериб чарчадик. ‘Бугун тузатамиз, эртага тузатамиз’, дейишдан нарига ўтмайди. Шу йил қишда жуда қийналдик. ‘Отоплениени’ улайлик десак, иссиқлик тизими яхши ўрнатилмагани учун уйни сув босиб кетади. Кейин электр печ ҳам ишлатолмаймиз. Шу сабаб ҳам фарзандим қишда қайта-қайта шамоллади. Қурувчи эса бу ҳақда ўйлаб ҳам кўрмайди», — дейди Зарина Умирова.
Ҳудуддаги арзонлаштирилган уйлар буюртмачиси «Қишлоққурилишинвест»нинг туманга бириктирилган мутахассиси Суюн Боймуродовнинг гапига кўра, аҳоли учун қурилган уйлардаги эшик ва дераза ромларининг сифатсизлиги қурувчи ва буюртмачига боғлиқ эмас.
«Дераза ва эшик ромлари бизга Тошкент шаҳридан келади. Тендерда ким ютиб олса, ўша таъминотчи олиб келади. Уларнинг сифати учун биз жавоб бермаймиз. Бизнинг қурувчилар эшик ва дераза ромларига ўзгартириш киритмайди. Борини ўрнатиб беради», — дейди Суюн Боймуродов.
«Дарё» мухбири билан суҳбатлашган аҳоли вакилларининг айтишича, мазкур маҳаллада 2017, 2018 ва 2019 йилларда кўплаб намунали турар жойлар қурилган.
«Уч йил давомида кетма-кет қурилган намунали уй-жойларнинг 2018 йил қурувчи Азамат Тошонов раҳбарлигида қурилганлари умуман сифатсиз. Талабга жавоб бермайди», — дейди шу уйларда яшовчи Лобар Аннаева. — Аммо 2017 йил қурувчи Мамаюсуф Эшбобоев томонидан қурилган уйлар сифатли. Шу кунга қадар бирор-бир муаммо кузатилмаган»
Шу маҳалладан 2019 йил янги уй харид қилиб, кўчиб кирган Лобар Турсунованинг маълум беришича, у сотиб олган уй ҳам сифатсиз қурилган.
«Сотиб олган уйимизга 2019 йил баҳор ойида кўчиб киришимиз керак эди. Аммо уйнинг камчилиги аниқлангач, кўчиб ўтмадик ва таъмирлаб беришганидан сўнг 2019 йил сентябрь ойида уйга кирдик», — дейди Лобар Турсунова.
Лобар Турсунованинг айтишича, унга тегишли уйнинг меҳмонхона девори текшириб кўрилганда ғиштдан сўнг цемент ишлатилмагани, деворга қумсувоқдан кейин пардозлаш ишлари бажарилгани маълум бўлган.
«Девор қумсувоқлигича қолгани ва цемент ишлатилмагани аниқлангач, қурувчига шикоят қилдим ва кўчиб киришдан бош тортдим. Ҳатто Президент порталига ҳам мурожаат қилдим. Шундан сўнг келиб, камчиликни тўғирлаб беришди», — дейди Лобар Турсунова. — Аммо ҳалигача уй қурилишидаги камчиликлар тугагани йўқ»
2018 йил март ойида уй харид қилган Сирожиддин Қаршиевнинг айтишича, уйнинг нафақат хоналарида, ҳатто том қисмида ҳам муаммо бор.
«Томга чиқиб кўрганимизда шифер тагида етарли даражада ёғоч ишлатилмагани маълум бўлди. Бу камчилик ҳақида қурилиш ташкилоти раҳбарига шикоят қилдик. Келиб тузатиб кетишди», — дейди хонадон вакиллари.
Ушбу уйларни қурган қурилиш ташкилоти «Намуна Сабрина махсус сервис» хусусий корхонаси раҳбари Азамат Тошоновнинг тан олишича, юқорида тилга олинган камчиликларнинг аксарияти бартараф этилган.
«Камчилиги бор уйларнинг барча муаммоларини бартараф этиб, тўғирлаб берганмиз. Агарда яна муаммолари бўлса, биз тўғирлаб берамиз», — дейди Азамат Тошонов.
Азамат Тошоновнинг маълумот беришича, унинг раҳбарлигидаги қурилиш ташкилоти ушбу ҳудудда 2017 йил 5 та, 2018 йил 5 та — жами 10 та уй қурган.
«Баъзи хонадон эгалари уйнинг таъмиридан кўнгли тўлмай ўзлари уста олиб келишди. Камчилигимиз бўлган бўлса, тан олиб қурилиш материалларини бердик, ҳатто усталарининг хизмат ҳақини ҳам тўладик. Имкон қадар ҳеч кимни норози қилмасликка ҳаракат қиляпмиз», — дейди қурувчи ташкилот раҳбари.
Мавзуга доир: «Кўзбўямачилик». Қашқадарёда қурилиши бошлаб юборилган 19 та уй тендер савдосига қўйилиб, талабгор қурувчи изланмоқда
Аҳолининг қўшимча қилишича, ҳудудда электр токи ҳам муаммо.
«Бир кун ‘свет’ бўлса, уч кун ўчириб қўйишади. Сабабини сўрасак, линияда носозлик кузатилган, дейишади. Сал ёмғир ёғса ҳам бизда носозлик юзага келиб, икки-уч кунлаб ‘светъсиз ўтирамиз. Туман электр таъминоти корхонаси раҳбари Эркин Пардаевга қанча мурожаат қилмайлик, фойдаси йўқ», — дейди Лобар Аннаева.
Аниқланишича, ушбу намунали уйда яшовчиларнинг аксарияти ўқитувчилар бўлиб, электр токидаги узилишлар онлайн машғулот олиб боришда қийинчилик туғдирмоқда.
«Шу уйга кўчиб келганимиздан бери электр токи бир маромда берилганини эслолмайман, — дейди Лобар Турсунова. — Сал ёмғир ёғса ёки шамол бўлса, ‘светъсиз қоламиз. Энг ёмони бу ҳолат икки-уч кунлаб давом этади. Туман электр таъминоти раҳбарига муаммони айтсак, эшитгиси келмайди. Навбатчига қўнғироқ қилсак, телефонга жавоб бермайди»
Таъкидланишича, электр токидаги носозликлар сабаб телевизорлар ҳам тез-тез куяди.
Бу ҳолатни эшитган туман электр таъминоти корхонаси раҳбари Эркин Пардаев туманда икки-уч кунлаб электр токи бўлмаслигини инкор қилди.
«Бухоро ва Сардобадаги воқеалар сабаб одамлар уйсиз, ‘светъсиз яшаяпти-ку. Нега булар нолишади, тушунмайман. Тўғри, олдин тўрт-беш кунлаб электр токини ўчириб, токни тежардик. Бугунги кунда бу ҳолат йўқ-ку. Ҳар доим электр токи билан таъминлашга ҳаракат қиляпмиз», — дейди Эркин Пардаев.
Эркин Пардаевнинг айтишича, Бухоро вилоятидаги воқеаларга сабаб бўлган кучли шамол пайтида туманда ҳам носозликлар кузатилган. Аммо ундан кейин бундай ҳолат юз бермаган.
Ғузорлик мурожаатчиларнинг «Дарё» мухбирига қўнғироқ қилиб маълум қилишича, намунали уйларда 8 май куни ҳам соат 13:30 дан 17:30 гача электр токи бўлмаган. Соат 17:30 да ёнган чироқ ёмғир ёғиши натижасида 20:15 да яна ўчган. Туман электр таъминоти корхонаси навбатчиси эса тармоқ носоз эканлигини такрорлаб, аҳолига бу тармоқдан электр токи берилиши нотўғри эканлигини қўшимча қилган.
Изоҳ (0)