Тошкентда Malibu’ларнинг салон ва юкхонасига яширилган 300 миллион сўмлик кучли таъсир қилувчи дори воситаларининг ноқонуний айланувига чек қўйилди, деб хабар беради Давлат божхона қўмитаси матбуот хизмати.
Қайд этилишича, Божхона қўмитасининг Тошкент шаҳар божхона бошқармаси Контранбадага қарши курашиш ходимлари томонидан Давлат хавфсизлик хизмати Тошкент шаҳри бўйича бошқармаси ҳамда ички ишлар ходимлари билан ҳамкорликда тезкор тадбир ўтказилган. Тадбирда Яккасарой туманида олдиндан кузатувга олинган, туман ҳудудида ҳаракатланиб келаётган Malibu русумли транспорт воситаси белгиланган тартибда тўхтатилиб, холислар иштирокида кўздан кечирилган.
Натижада, мазкур транспорт воситасининг 29 ёшли ҳайдовчиси, муқаддам Жиноят кодексининг тегишли моддаси билан судланган шахсга қарашли бўлган машинанинг ҳайдовчи ва йўловчи ўриндиқлари остига беркитилган 23 та полиэтилен пакет ўрамларида кучли таъсир қилувчи дори воситалари борлиги аниқланган. Шунингдек, улар транспорт воситасининг орқа юкхонаси ички қоплама қисмиларига ҳам кучли таъсир қилувчи дори воситаларини яширган.
Ўтказилган тезкор табдир давомида тахминий қиймати 300 миллион сўмлик 479 дона “Тропикамид” ва 2800 дона “Регапен” номли кучли таъсир қилувчи дори воситаларининг ноқонуний айланувига чек қўйилган.
Тошкент шаҳар Бектемир тумани “Шарқ” йўл-патрул масканида ўтказилган навбатдаги тезкор тадбирда эса олдиндан олинган тезкор маълумотларга асосан Malibu русумли транспорт воситасида йўловчи сифатида ҳаракатланиб келган фуқаро ва унинг қўл юклари белгиланган тартибда кўздан кечирилганида, унинг устига кийган кийимларида 30 дона “Тропикамид” номли кучли таъсир қилувчи дори воситалари борлиги аниқланган.
Юқоридаги ҳолатлар юзасидан тегишли процессуал ҳужжатлар расмийлаштирилиб, ҳозирда терговга қадар текширув ҳаракатлари олиб борилмоқда.
Бундан олдин Сирдарёда психотроп дорилар савдоси билан шуғулланган шахслар қўлга олингани, ДХХ Тожикистон ва Қирғизистондан олиб келинган гиёҳванд моддалар савдоси билан шуғулланувчи шахсларни ушлагани, Тошкент вилоятида ўтказилган назорат-рейд тадбирларида синтетик гиёҳванд воситаларини тайёрловчи лаборатория ташкил қилган шахслар қўлга олингани тўғрисида хабар берилганди.
Изоҳ (0)