Тошкент вилоятининг Қозоғистон билан чегарадош “Яллама” чегара божхона постида фургондан қарийб 20 килограмм героин аниқланди. Бу ҳақда Давлат божхона қўмитаси хабар берди.
Ҳужжатларга кўра бўш дея кўрсатилган Тожикистон давлат рақамига эга юк машинаси салонининг пол қисми остидан скотч билан ўралган 36 дона ўрам яширилгани маълум бўлган. Улар ичидан ўткир ҳидли модда, дастлабки маълумотларга кўра, героин чиққан.
Ҳозирда ушбу ҳолат юзасидан тергов ҳаракатлари олиб борилмоқда.
Гиёҳванд моддалар савдоси
Июль ойида Тошкент халқаро аэропортида сўнгги 30 йил ичидаги энг йирик миқдордаги — 8,5 тонна гиёҳвандлик моддаси тўхтатиб қолинганди. Март ойи ўрталарида эса ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланган эди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Изоҳ (0)