ДХХ учта вилоятда Тожикистондан олиб келинган 9 кг наркотик моддалар савдосига чек қўйди (видео)

Давлат хавфсизлик хизмати Хоразм, Бухоро ва Тошкент вилоятида ноқонуний гиёҳванд моддалар савдоси билан боғлиқ ҳолатларга чек қўйди, деб хабар беради ЎзА.

Қайд этилишича, ДХХнинг Хоразм вилояти бўйича бошқармаси ходимлари томонидан бошқа ҳуқуқни муҳофаза қилувчи идоралар билан ҳамкорликда тезкор тадбир ўтказилган. Тадбирда Хазорасп туманида яшовчи фуқаро бошқарувидаги Cobalt русумли автомашина тўхтатилиб, холислар иштирокида кўздан кечирилган. Натижада, унинг салонида жами 6 бўлакда 3 килограмм 982 грамм опий гиёҳвандлик воситаси борлиги аниқланиб, процессуал тартибда расмийлаштириб олинган.

Тезкор суриштирув ҳаракатлари давомида мазкур шахс Тожикистондан келтирилган ушбу ажал оғусини Сурхондарё вилоятининг Сариосиё туманида яшовчи икки нафар фуқародан олганлиги маълум бўлиб, Хазорасп туманидаги меҳмонхонанинг улар жойлашган хонасидан сотиш учун мўлжалланган 1 килограмм 952 грамм опий моддаси ҳам тегишли тартибда расмийлаштириб олинган.

Шунингдек, тезкор тадбир давом эттирилиб, ушбу гиёҳвандлик воситасини сотиб олган вақтларида яна икки нафар хазорасплик наркосавдогарлар ушланган.  

Бухоро вилоятида қайд этилган ҳолатда эса Ғиждувон туманида яшовчи, 1973 ва 1975 йилларда туғилган, муқаддам судланган икки нафар фуқаро Бухоро шаҳрида 1 килограмм 224 грамм опий моддасини 50 минг долларга сотган вақтларида Давлат хавфсизлик хизмати ва божхона органлари ходимлари томонидан ашёвий далиллар билан ушланган.

Давлат хавфсизлик хизматининг Тошкент вилояти бўйича бошқармаси ҳамда вилоят божхона бошқармаси ходимлари ҳамкорлигида ўтказилган тезкор тадбирда, Бўка тумани ҳудудида ҳаракатланаётган Nexia русумли автотранспорт воситаси тўхтатилиб, текширилган.

Натижада унда йўловчи сифатида кетаётган, Фарғона вилоятининг Бағдод туманида яшовчи, 33 ёшли фуқаро ёнида 1,9 килограмм гашиш моддаси борлиги аниқланиб, процессуал тартибда расмийлаштириб олинган.

Ушбу ажал оғуси тожикистонлик наркокурерлар томонидан контрабанда йўли билан Тошкент вилоятига олиб келиниб, хуфия жойга қолдириб кетилган.

Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Август бошларида ДХХ Самарқанд вилоятида гиёҳванд моддалар олди-сотдиси билан шуғулланиб келган гуруҳни қўлга олганди. Ўшанда Ургут туманида яшовчи 1978 ва 1986 йилларда туғилган опа-сингил 911 грамм опий гиёҳвандлик моддасини 12 минг АҚШ долларига сотган вақтида ушланган. Шунингдек, Тошкентда Киа машинасида наркокурерлик билан шуғулланган шахс ушлангани тўғрисида хабар берилганди.