Фарғона, Хоразм, вилоятлари ва Тошкент шаҳрида гиёҳванд модда ва кучли таъсир қилувчи дори воситалари ноқонуний айланмаси олди олинди.
Давлат хавфсизлик хизматининг Фарғона вилояти бўйича бошқармаси ходимлари томонидан божхона органлари билан ҳамкорликда ўтказилган тезкор тадбирда Тошкент—Фарғона йўналишида ҳаракатланаётган, Марғилон шаҳрида яшовчи, 1992 йилда туғилган шахс бошқарувидаги Damas “Наманган” ЙПХ масканида тўхтатилиб, кўздан кечирилганда автомобиль орқа ўриндиғига яшириб қўйилган 9 килограмм 573 грамм гашиш моддаси борлиги аниқланиб, тегишли тартибда расмийлаштириб олинган.
Шунингдек, терговга қадар текширув ҳаракатлари давомида, мазкур шахснинг яшаш хонадонидан ҳам 2 килограмм 779 грамм гашиш ва 1 килограмм 29 грамм опий моддалари ҳужжатлаштириб олинган.
Тезкор тадбир давомида ушбу фуқаронинг Фарғона ва Марғилон шаҳарларида истиқомат қилувчи, 1987, 1989 ва 2003 йилларда туғилган шериклари ҳам қўлга олинди.
Улардан бири муқаддам гиёҳвандлик воситалари савдоси билан боғлиқ жинояти учун судланган бўлса-да, ўз хатосидан тўғри хулоса чиқармаган.
Давлат хавфсизлик хизматининг Хоразм вилояти бўйича бошқармаси ходимлари томонидан божхона ва ички ишлар органлари билан ҳамкорликда Тупроққалъа туманида ўтказилган тезкор тадбирда Самарқанд—Хоразм йўналишида ҳаракатланаётган, Самарқанд шаҳрида яшовчи, 1992 йилда туғилган фуқаро бошқарувидаги Kia русумли автотранспорт воситаси тўхтатилиб, кўздан кечирилганда автомашинада 2 килограмм 821 грамм опий моддаси борлиги аниқланиб, процессуал тартибда расмийлаштирилган.
Аниқланишича, у Тожикистонда яшовчи фуқародан ҳар бир килограммини 6500 доллардан сотиб олган ушбу наркотик моддани Хоразм вилоятидаги гиёҳвандфурушларга сотишни режалаштирган.
Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор тадбирда, Тошкент шаҳрининг Яшнобод туманида истиқомат қилувчи, 1990 йилда туғилган фуқаронинг яшаш хонадони холислар иштирокида кўздан кечирилган.
Унда кир ювиш воситалари пакетларига қадоқланган 45 килограмм 898 грамм кристалл кукунсимон моддалар мавжуд бўлиб, уларнинг таркибида “Прегабалин” кучли таъсир қилувчи моддаси борлиги аниқланди. Шунингдек, фаол тадбир давомида 1 килограмм190 грамм “Тропикамид” моддаси ҳам мусодара қилинди.
Тошкент шаҳрининг Миробод туманида ўтказилган тезкор тадбирда эса Фарғона вилоятининг Данғара туманида яшовчи, 1986 йилда туғилган, муқаддам бир неча маротаба судланган шахс 1512 дона “Регапен” ва 300 дона “Тропикамид” кучли таъсир қилувчи дори воситаларини Тошкент шаҳрида истиқомат қилувчи, 1991 йилда туғилган, муқаддам бир неча маротаба судланган фуқарога 60 миллион сўмга сотган вақтида ушланди.
Маълум бўлишича, ушбу дори воситалари Қирғизистондан олиб келинган.
Ҳозирда мазкур шахсларнинг барчасига нисбатан жиноят ишлари қўзғатилиб, қамоқ эҳтиёт чораси қўлланилган.
Изоҳ (0)