Қозоғистонда 12 ёшгача бўлган болаларни уйда ёлғиз қолдириш тақиқланиши мумкин. Тегишли таклиф Бола ҳуқуқлари бўйича вакил Динара Закиева томонидан илгари сурилди.
Болалар омбудсманининг мазкур таклифига болалар иштирокидаги бир қатор фожиали ёнғинлар туртки бўлди. Закиевага кўра, 2024 йил бошидан буён Қозоғистонда 15 та ёнғин содир бўлган, уларда болалар ҳалок бўлган. Аксарият ҳолларда фожиа болалар уйда ёлғиз қолганда кузатилган.
Фактларни таҳлил қилиб, 12 ёшдан кичик болаларни вояга етган шахслар назоратисиз қолдиришни тақиқловчи қонунчилик чораларини ишлаб чиқиш зарур, деб ҳисоблайман. Албатта, ёрдамга муҳтож оилалар давлат томонидан кўзда тутилган қўллаб-қувватлаш дастурлари билан таъминланиши лозим, деди болалар ҳуқуқларини ҳимоя қилувчи вакил.
11 октябрь куни Қўстанай вилояти Житикар шаҳрида уйда чиққан ёнғин ва том қулаши оқибатида қаровсиз қолган беш нафар бола ҳалок бўлди. 2011 йилда туғилган катта фарзанд жароҳат олмаган. Қозоғистон Бош прокурори жиноят иши бўйича тергов жараёнини назоратга олган.
Бутун мамлакатни ларзага солган шунга ўхшаш фожиа 2019 йил 4 февраль куни Остона шаҳрида юз берди. Сариарка туманидаги Кўктал-1 турар-жой массивидаги уйда ёнғин содир бўлди. Оқибатда 2006, 2009, 2014, 2016 ва 2018 йилларда туғилган беш нафар бола ҳалок бўлганди.
Изоҳ (0)