DXX qo‘lga olingan jurnalistlarga jinoyat ishi qo‘zg‘atilganini ma’lum qildi

“Human.uz” nashri direktori Xurshid Daliyev va bosh muharriri Muslim Mirzajonov va saytning boshqa xodimlari qo‘lga olingandi. DXX qo‘lga olingan jurnalistlarga jinoyat ishi qo‘zg‘atilganini ma’lum qildi.

Qayd etilishicha, fuqaro I.A.dan kelib tushgan murojaatga asosan, Xurshid Daliyev va boshqalar Telegram’dagi “Kompromatuzb” hamda boshqa kanallar orqali amalga oshirilgan jinoyatlarga aloqadorligi sababli qo‘lga olingan.

Ularga nisbatan Jinoyat kodeksining 165-moddasi (tovlamachilik) 2-qismi “v” bandi bilan jinoyat ishi qo‘zg‘atilgan va hozirda dastlabki tergov harakatlari olib borilmoqda. Tergov davomida prosess ishtirokchilari advokat bilan ta’minlangan.

Ma’lumot o‘rnida, 165-modda 2-qismi “v” bandi: bir guruh shaxslar tomonidan oldindan til biriktirib sodir etilgan bo‘lsa, besh yildan o‘n yilgacha ozodlikdan mahrum qilish bilan jazolanadi.

“Tergov jarayonlarini olib borishda ularning qonun bilan belgilangan huquq va erkinliklari ta’minlanishi kafolatlanadi. Ushbu jarayon bilan bog‘liq ma’lumotlar doimiy ravishda e’lon qilinib boriladi”, — deyiladi bayonotda.

27-yanvar kuni “Human.uz” nashri direktori Xurshid Daliyev va bosh muharriri Muslim Mirzajonov va saytning boshqa xodimlari qo‘lga olingani haqida xabar berilgandi. 

Milliy mass-mediani qo‘llab-quvvatlash va rivojlantirish jamoat fondi ushbu nashr jurnalistlarining qo‘lga olinishi bilan bog‘liq vaziyatdan xavotirda ekanligini bildirgan.

Axborot va ommaviy kommunikasiyalar agentligi esa huquqni muhofaza qiluvchi organlar va Raqamli texnologiyalar vazirligiga tegishli so‘rovlarni yuborgan. Vazirlik “Human.uz” veb-sayti bloklanmaganini ma’lum qilgan.