1 декабрда ўз лавозини тарк этаётган Европа иттифоқи дипломатияси раҳбари Жосеп Боррел фикрича, АҚШнинг сайланган президенти Дональд Трампнинг Оқ уйга қайтиши Европа иттифоқини ҳушёр бўлишга мажбур қилиши керак.
Биз “Брексит”га қандай муносабатда бўлсак, Трамп билан ҳам шундай қилишимиз керак: биргаликда ҳаракат қилиб, бўлиниб кетишимизга йўл қўймаслигимиз керак, деди дипломат Испаниянинг La Razon газетасига берган интервьюсида.
Трампнинг “Америка ҳаммадан устун” ғояси бутун дунё ва Европа учун хавфли. Трампнинг қайтиши Европани ҳушёр бўлишга мажбур қилиши керак, дея қўшимча қилди у.
Шунингдек, Боррел Яқин Шарқдаги вазият бўйича ҳам муносабат билдирди.
“Исроил бош вазири Биньямин Нетаньяху ўт очишни тўхтатиш зарурати бўлган Ғазо секторида ҳарбий амалиётларни давом эттиришни хоҳлаётганга ўхшайди. Қисқа муддатда Ғазода тинчликка эришиш осон бўлмаслигидан қўрқаман”, деди Боррел.
Унинг қўшимча қилишича, Европа иттифоқи аъзолари ўртасида Яқин Шарқдаги можаро бўйича ягона позиция йўқ.
Аввалроқ Боррел Трамп ғалабасидан кейин кучли ва суверен Европа қуришга чақирганди.
“Ягона ташқи ишлар ва хавфсизлик сиёсатининг бир қисми сифатида Европа иттифоқи Қўшма Штатлар билан фаол муносабатларни сақлаб қолиш учун бор кучини аямайди”, деб ёзган Боррел.
Унинг қайд этишича, айни пайтда ЕИ кучли ва суверен Европани барпо этиш учун турли соҳаларда – мудофаа ва хавфсизликдан тортиб иқлимгача бўлган мажбуриятларни бажаришда давом этмоқда. Боррелга кўра, Трампнинг сайланиши глобал хавфсизлик билан боғлиқ барча минтақалар, жумладан, Яқин Шарқ ва Украина учун ҳам таъсир кўрсатади.
Изоҳ (0)