Қорақалпоғистоннинг Нукус шаҳри, Тўрткўл ва Қораўзак туманларида энергия ресурсларидан ноқонуний фойдаланиш ва қалбаки далолатнома тузиб бериш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Нукус шаҳрида фаолият юритувчи “П.Ф.” МЧЖ масъул шахслари мактабгача таълим муассасасида давлат стандартларига жавоб бермайдиган яроқсиз газ ҳисоблаш ускунасини ўрнатган. Натижада 200 млн сўмлик табиий газдан ноқонуний фойдаланилган.
Шунингдек, Тўрткўл туманида ЭТК муҳандиси Т.И. ЯТТ Н.Т.нинг савдо дўконига янги электр ҳисоблагич ускунасини ўрнатиб, ҳисоблагич ўрнатилганлиги тўғрисида қалбаки далолатнома тузган. У Н.Т.га жами 69 млн сўмлик “свет”дан ноқонуний фойдаланишга шароит яратиб берган.
Бундан ташқари, Қораўзак туманида “Р.с.” ва “В.М.” МЧЖ масъул шахслари электр сув насосларини умумий фойдаланишдаги тармоққа ўзбошимчалик билан улаб, 70 млн сўмлик электр энергиясидан ноқонуний фойдаланган.
Мазкур ҳолатлар юзасидан Жиноят кодексининг 169-моддаси (ўғрилик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Бу ҳолатлар деярли ҳар куни учрамоқда
Жумладан, 12 ноябрь куни “Дарё” шу каби ҳолатлар ҳақида хабар берган. Масалан, Жиззахда 1,1 млрд сўмлик “свет”дан ноқонуний фойдаланган шахс ушлангани, бундан ташқари, учта вилоятда жами 628 млн сўмлик “свет”дан ноқонуний фойдаланиш ҳолатлари аниқлангани ҳақида хабар берилди.
Аввалроқ, Сирдарёда 683 млн сўмлик “свет”дан ноқонуний фойдаланган шахс ушланган эди. Шунингдек, Сирдарёдаги маиший хизмат кўрсатиш шохобчасида 325 млн сўмлик “свет”дан ноқонуний фойдаланилгани аниқланганди.
Шу билан бирга, Қорақалпоғистон Республикаси ва Тошкентда жами 2 млрд сўмлик “свет”дан ноқонуний фойдаланилгани ҳақида хабар берилган эди. Ангрендаги метан заправка 1,1 млрд сўмлик электр энергиясидан, Самарқанддаги метан заправкада 6,6 млрд сўмлик газдан ноқонуний фойдаланилгани аниқланган.
Изоҳ (0)