Сурия қуролли мухолифатининг ҳарбий операциялар департаменти президент Башар Асадни қўлга олишга ёрдам берадиган маълумот учун 10 миллион доллар мукофот эълон қилди. Бу ҳақда Аlsaaл, Еni Safak ва Ipakyol нашри хабар берди.
Туркиянинг Milliyet нашри ҳам Асаднинг боши учун мукофот ваъда қилинганини ёзди, бироқ суммасига аниқлик киритмади. Сурия мухолифатининг қуролли гуруҳлари, жумладан, “Ҳаёт Таҳрир аш-Шом” жангчилари 28 ноябрь куни Ҳалаб вилоятининг ғарбий ҳудудларида ҳукумат қўшинларига йирик ҳужум бошлади. Улар Ҳалаб шаҳрини олгач, кейинги бир ярим ҳафта ичида Хомс, Хама шаҳарларини ишғол қилди ва Сурия пойтахти Дамашққа етиб келди.
Президент Башар Асад оиласи билан мамлакатни тарк этгани ҳақида хабарлар тарқалди. Кейинроқ Reuters нашри Асад бортида бўлган самолёт радарлардан йўқолгани, эҳтимол, уриб туширилган бўлиши мумкинлигини маълум қилди.
Россия Ташқи ишлар вазирлиги эса Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди.
Ўз навбатида, исёнчилар Сурия президентининг қаровсиз қолган саройига кирди, одамлар буюмларни талон-тарож қилишни бошлади. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланди. Ҳозирда Асад қароргоҳида ёнғин чиққани айтилмоқда.
Бош вазири ҳокимиятни топширишга тайёр
Сурия бош вазири Муҳаммад Ғози ал-Жалолий Сурия халқи томонидан танланган ҳар қандай раҳбарият билан ҳамкорлик қилишга ва ҳокимиятни “топшириш” учун ҳар қандай чора кўришга тайёрлигини маълум қилган.
У “Сурия давлатининг барча институтлари”ни сақлаб қолишга чақириб, давлат ишларини бошқаришни давом эттиришга тайёрлигини айтган. Сурия бош вазири Муҳаммад Ғози ал-Жалолий ўз уйидан чиқиб, қуролли шахслар ҳамроҳлигида мухолифат етакчиси билан учрашиш учун кетди.
AFP агентлиги исёнчилар етакчисига таяниб, Дамашқдаги давлат идоралари ҳокимият расман ўтказилгунга қадар бош вазир назорати остида қолишини маълум қилди.
Изоҳ (0)