Ўзбекистон президенти маслаҳатчиси Қаҳрамон Қуронбоев бошчилигидаги комиссия шу кунларда Россияга ташриф буюриб, у ерда ўқиётган ва ишлаётган мигрантлар шароитлари билан танишди.
Президент маслаҳатчиси Россия давлат думаси вице-спикери Владислав Даванков билан учрашувда Россиядаги мигрантлар болалари учун боғча ва мактаблар очишга ёрдам беришни сўраган.
“Говорит Москва” радиостанцияси билан суҳбатда россиялик депутат Михаил Делягин бу ташаббус ноқонуний эканлигини айтди.
“Ўзбекистон президентининг маслаҳатчиси Россия конституцияси ҳақида ҳеч нарса эшитмаган бўлса керак, бу қонунда одамларни миллатига кўра камситиш тақиқланган. Фақат мигрант болалар учун мактаблар очиш Россия Федерацияси фуқароларига нисбатан камситиш эканлиги аниқ. Тахминан, худди тожик диаспораси жаноблари фақат тожикларга хизмат кўрсатадиган тожик тиббиёт марказлари очилиши ҳақида гапирганда нимани назарда тутган бўлса, бу ҳам худди шундай.
Бу Россияни ичидан емириб, кейин эса йўқ қилиш бўйича атайлаб олиб бориладиган сиёсат. Бунда аввалига бегона бўлган, кейин эса душман кайфиятидаги анклавларни яратишга ҳаракат қилинади.
Менимча, Ўзбекистон, албатта, болалар боғчалари ва мактабларни қуриши керак, лекин фақат ўз ҳудудида. Ва Россияга сиқиб чиқарган фуқароларини қайтариб ватанига олиб кетиши керак. Чунки, айтайлик, Тожикистон аҳолисининг учдан биридан кўпроғи Россияда яшайди. Бу ҳолат Тожикистон учун ҳам, Россия учун ҳам мутлақо нормал эмас”, — деди Делягин.
2022 йилда Михаил Делягин федерал телеканаллардан бирида Озарбайжондан Россияга таҳдидлар бўлиши мумкинлигини таъкидлаб, бу давлатнинг нефть саноатига ядровий зарба беришни таклиф қилган эди.
Шундан сўнг Россия президентининг матбуот котиби Дмитрий Песков бу баёнот “ҳеч қандай ҳолатда Россия Федерациясининг расмий позициясига мос келмаслигини” айтиб ўтган, Озарбайжон эса мазкур депутатни халқаро қидирувга берганди.
Изоҳ (0)