Фарғонадаги шифохонада чап оёғи кесилиши керак бўлган беморнинг ўнг оёғи кесиб ташланди. Бу ҳақда “Миллар” дастурида хабар берилди.
Бемор аёлнинг ўғли онаси 10 йилдан буён қандли диабет касаллиги билан курашаётганини айтди. Унинг айтишича, аёлнинг чап оёғи уч марта шифохонада кесилган.
“Ўнг оёқлари ўзлари учун жуда зарур. ‘История’га ҳам чап оёқ деб ёзилган. Олиб киришди-ю, ўнг оёқни кесиб, менга олиб чиқиб беришди. Мен тўполон қилиб гапиргандим, кейин чап оёқни кесишди. Лекин унгача ўнг оёқни менга олиб чиқиб беришган эди”, дейди беморнинг ўғли.
У операциядан аввал ўзидан рухсат сўрашмаганини таъкидлади.
“Мендан ҳеч нарсани сўрашмади. Интервьюда эшитдим, ўнг оёқда тромб бор, дейишди. Нимага ўзлари биринчи кўрсатмада ёзилган оёқни олмасдан, ўнг оёққа тегинишди? Онамнинг оёқларини умуман қайтариб бера олишмайди. Ҳукуматимиздан қонуний чора кўришларини сўрайман”, дея қўшимча қилади аёлнинг ўғли.
Оёқлари кесилган бемор операцияда нималар бўлганини билмаслигини айтди.
“Мана энди иккаласи ҳам йўқ. Ўнг оёқни аввал кесамиз, дейишмаганди. Агар билганда, ўғлим, келиним кестирмас эди”, дейди бемор аёл.
Республика ихтисослаштирилган Эндокринология илмий-амалий тиббиёт маркази Фарғона филиали хирургия бўлими мудири в.б. Давлатжон Эргашевнинг айтишича, беморга режали равишда чап оёқ сон ампутацияси жарроҳлик амалиёти амалга оширилиши керак бўлган.
“Операция жараёнида оператор-хирург томонидан беморнинг ўнг оёғида ҳам критик ишемия аниқланган. Беморнинг ҳаётини сақлаб қолиш мақсадида хирург томонидан ўнг оёқ сон ампутацияси амалиёти ҳам бажарилган. Беморнинг ҳозирги пайтдаги аҳволи стабил. Реанимацияда, шифокорлар назоратида қолмоқда”, дейди Давлатжон Эргашев.
Мазкур ҳолат юзасидан Фарғона тумани прокуратураси томонидан терговга қадар суриштирув ишлари олиб борилмоқда.
Шу билан бирга, суд тиббий экспертизаси тайинланган.
Изоҳ (1)
Эх, Ўзбекистон.
Нималар бўляпти, ўзи.
Тиббийот сохасига, хохлаганларни эмас, ОЛЛОХ нимадир берганларни қабўл қилиб ўқитиш керак.
Тиббийот сохасига контракт, суперконтракт бўлиши бу, ўзи нотўғри.