Қарши туманида яшовчи аёл қизи туман ҳокими Зоир Алиқуловнинг жияни бошқарувидаги машинада уриб кетилганини, айни пайтда фарзанди шифохонада аҳволи оғир ҳолатда эканини айтиб, видеочиқиш қилганди. Кўп ўтмай аёл хато маълумот тарқатганини маълум қилди. Қарши тумани ҳокимлиги эса аёлнинг видеочиқишига раддия билдирди.
Ижтимоий тармоқларда тарқатилган “Қарши тумани ҳокимининг жияни фуқарони уриб, қочиб кетди” мазмунида эълон қилинган хабарлар мутлақо ҳақиқатга тўғри келмайди. Аслида жорий йил 15 август куни тахминан соат 22:50 ларда Миришкор туманида яшовчи фуқаро Ғ.И. бошқарувида бўлган Gentra Қарши—Бешкент—Касби—Миришкор йўлидан ҳаракатланиб келиб, Қарши тумани жойлашган “Аvto Room” автосалони рўпарасида йўлнинг чап томонидан ўнг томонига пиёда ҳаракатланиб ўтаётган М. А.ва М. О.ни уриб юбориб, йўл-транспорт ҳодисаси содир этган. Натижада М.А ҳамда М.О.лар тан жароҳати олиб шифохонага тушган, дейилади ҳокимлик раддиясида.
Ҳокимликнинг тушунтириш беришича, уриб юборилган қизалоқнинг онаси томонидан эълон қилинган видеолавҳа кучли ҳаяжон пайтида тарқатилганлиги маълум бўлган.
Туман ҳокими ўринбосари фуқаро билан суҳбатлашганда туман ҳокими томонидан кўрсатилган ёрдам фуқаро томонидан нотўғри талқин қилинганлигини, шу боис ҳам ижтимоий тармоқларда туман ҳокими жияни талқини берилганлиги маълум бўлди, дейилади ҳокимлик раддиясида.
Ҳокимлик ахборот хизмати ижтимоий тармоқ фойдаланувчилари ва аҳолига интернетда асоссиз ва ёлғон хабар тарқатиш, қонун билан жавобгарликка сабаб бўлишини эслатмоқда.
“Дарё” журналисти мазкур ҳолат юзасидан Қарши тумани ҳокими Зоир Алиқулов билан ҳам мулоқот қилди.
Туман ҳудудида содир бўлган ҳар қандай ЙТҲ эътиборимдан четда қолмайди. Шу заҳоти шифохона етиб бориб, ҳар сафар беморларга ёрдам кўрсатишга, имкон қадар ҳаётини сақлаб қолишга ўз ҳиссамни қўшишга ҳаракат қиламан. Кеча содир бўлган ЙТҲ иштирокчиларига ҳам ёрдам бериш мақсадида одатдагидек шифохонага бориб, кўмак беришга уринганим бошқача талқин қилинибди.
Бу масалада бемор қизнинг онаси билан суҳбатлашиб, мен доимгидек ўз ишимни қилганимни, ЙТҲ содир этган фуқаронинг менга ҳеч қандай алоқаси йўқлигини айтиб, тушунтириш бердим. Ўйлайманки, аёл хатосини тушуниб етди. Биз ҳам унинг ҳаяжонда фарзанди учун жон куйдириб, хато гапириб қўйганини кечирдик, дейди Қарши тумани ҳокими Зоир Алиқулов вазиятга шахсан изоҳ берар экан.
Изоҳ (0)