Олий Мажлиснинг инсон ҳуқуқлари бўйича вакили (омбудсман)га фуқаро Б.Н. унинг розилигисиз руҳий касалликлар шифохонасига жойлаштирилгани ва тиббий кўрикдан ўтказилгани бўйича масъулларга чора кўрилишини сўраб мурожаат қилди. Бу ҳақда Омбудсман ахборот хизмати хабар берди.
Мурожаатга кўра, фуқаро Б.Н. туман ИИБ профилактика инспектори ва маҳалла вакиллари билан ҳамкорликда қонунга зид равишда Қўқон шаҳрида жойлашган вилоят 2-сонли руҳий касалликлар шифохонасига жойлаштирилган.
Мурожаат вакил назоратига олиниб, ҳолат омбудсманнинг Фарғона вилоятидаги минтақавий вакили томонидан жойига чиқиб ўрганилди.
Минтақавий вакил фуқаро Б.Н. билан учрашганда у руҳий касалликлар шифохонасига кўрикдан ўтказиш учун жойлаштирилишида розилик хатига имзо қўймагани, шунга қарамасдан уни шифохонага жойлаштиришгани ва 3 кун давомида кўрикдан ўтказишгани ҳамда соғлом бўлгани сабабли жавоб бериб юборишганини маълум қилган.
Мурожаат юзасидан ўтказилган ўрганиш давомида фуқаро Б.Н.нинг сўзлари тасдиқланди. Яъни шифохона қабулхонасида даволаниши учун олинган розилик тилхатида унинг имзоси бўлмагани, шунга қарамасдан, унинг руҳий ҳолатини текшириш учун қабул қилган врач А.Жўраев томонидан шифохонага жойлаштирилиб, тиббий кўрикдан ўтказилгани аниқланди.
Омбудсман хулосасига кўра, шифохонанинг навбатчи врач-психиатри А.Жўраевга ўз ишига совуққонлик билан ёндашгани учун ҳайфсан берилган.
Изоҳ (0)