2023 йилнинг 16–17 декабрь кунлари Туркманистон ташқи ишлар вазири Рашид Мередов қўшма лойиҳаларни муҳокама қилиш мақсадида Афғонистоннинг Ҳирот вилоятига амалий ташриф билан борди.
Туркманистон Ташқи ишлар вазирлигининг хабар беришича, томонлар “Туркманистон—Афғонистон—Покистон—Ҳиндистон (ТAPI) газ қувури, Туркманистон—Афғонистон—Покистон (ТAP) юқори волтли электр узатиш линияси лойиҳаларини амалга оширишнинг жорий ҳолатини, Афғонистон темирйўл инфратузилмасини кенгайтириш” масалаларини муҳокама қилган.
Туркманистон делегацияси Афғонистоннинг қатор расмийлари: ташқи ишлар вазири Амирхон Муттақий, кончилик вазири Шаҳабутдин Делавар, саноат ва савдо вазири Нуреттин Азизий билан учрашувлар ўтказган.
Мутахассисларнинг “Дарё”га маълум қилишича, икки давлат учун стратегик аҳамиятга эга лойиҳа ТAPI газ қувури қурилиши бўлиб, қувур бўйлаб йўл инфратузилмаси ва электр тармоғини барпо этиш режалаштирилган.
Йилига 33 миллиард куб метр газ ўтказиш қувватига эга газ қувури қурилиши 2015 йил декабрь ойида бошланган. Бу даврда Туркманистон томони Афғонистон чегарасига линияли қувур олиб келди ва хом ашё манбаи — супергигант Галкиниш конини қазишга киришди.
Афғонистон ҳудудида узунлиги 800 километрдан ортиқ бўлган ТAPI Ҳирот, Фараҳ, Нимрўз, Ҳилманд ва Қандаҳор вилоятларини қамраб олиши керак.
Яқинда “Толибон” ҳукумати ўз ҳудудидаги ТAPI лойиҳаси учун маблағ тўлашга тайёрлигини билдирди. Бу ҳақда мамлакат Кончилик ва нефть вазирлиги вакили Ҳомоюн Афғон маълум қилди.
Изоҳ (0)