Афғонистон кончилик ва нефть вазирлиги матбуот котиби Эсматулла Бурҳон TAPI (Туркманистон, Афғонистон, Покистон, India (Ҳиндистон) газ қувури қурилиш ишлари тўрт ой ичида қайта бошланишини маълум қилди, дея хабар бермоқда TOLOnews нашри.
«Қурилишнинг кечикиши сабаби газ қувури ётқизиладиган ерни сотиб олиш билан боғлиқ. Айни дамда қурилишни бошлаш учун зарур бўлган ҳудуднинг ўн беш фоизга яқинини харид қилиш қолди» — деган Эсматулла Бурҳон. «Толибон» расмийси бу вазифа яқин келажакда ҳал бўлишини ҳам айтиб ўтган.
Жорий йилнинг январь ойида «Толибон» (Афғонистоннинг амалдаги ҳукумати) вакиллари Ашхободга ташриф буюриб, TAPI қурилиши март ойида қайта тикланиши режалаштирилаётганини маълум қилган эди. Бироқ бу ваъда амалга ошмади. Аввалроқ лойиҳанинг бошқа иштирокчилари газ қувурининг хавфсизлиги ҳақида бир неча бор хавотир билдирганди. Бунга жавобан 2022 йил февраль ойида «Толибон» TAPI ҳимоясини таъминлаш режасини тақдим этди.
Март ойида лойиҳанинг координатори бўлган Осиё тараққиёт банки (ОТБ) «Толибон ҳукумати БМТ ва дунёнинг йирик иқтисодлари томонидан тан олинмагунча» лойиҳадаги иштирокини тўхтатган эди. «Толибон» эса, ўз навбатида, қурилиш ОТБсиз давом этишини маълум қилди.
Апрель ойида Ҳиндистон президенти Туркманистонга ташрифи чоғида яна TAPI хавфсизлиги масаласини кўтарди. Туркманистон томони Ҳиндистоннинг газ қувури хавфсизлигини таъминлаш бўйича таклифларини «бизнес юритиш тамойилларини» интеграциялаштирган ҳолда ўрганишга ваъда берди.
Изоҳ (0)