«Толибон» газ нархини муҳокама қилиш учун Туркманистонга ташриф буюришини маълум қилди

Афғонистондаги «Толибон» ҳукуматининг Ички ишлар вазирлиги вакиллари ва TAPI Pipeline (Туркманистон—Афғонистон—Покистон—Ҳиндистон табиий газ қувури) компанияси бош ижрочи директори Муҳамметмурат Аманов ўртасида 25 август куни онлайн музокаралар бўлиб ўтди. Бу ҳақда Bakhtar нашри хабар бермоқда.

Аманов қувур хавфсизлигини таъминлаш масалалари билан қизиққан. Учрашувнинг бошқа тафсилотлари келтирилмаган.

20 август куни TOLO news телеканали Афғонистон ҳукуматида TAPI бўйича амалий ишларни бошлаш учун қўмита тузилгани ҳақида хабар берганди. Янги тузилмани бош вазирнинг биринчи ўринбосари мулла Абдул Ғани Барадар бошқарган.

Афғонистон Ташқи ишлар вазирлиги маълумотларига кўра, Афғонистон делегацияси газ нархи ва газ қувури лойиҳасини амалга ошириш масалаларини муҳокама қилиш учун тез орада Туркманистонга ташриф буюради.

«Биз Туркманистонга ташриф буюриб, газ нархлари, Ҳиротдаги лойиҳаларни амалга ошириш (ушбу вилоят орқали газ қувури ётқизилади – «Дарё» изоҳи), шунингдек, саноат парклари масалаларини муҳокама қилиш ниятидамиз», — деган Афғонистон ТИВ матбуот котиби Шафай Аъзам.

Эслатиб ўтамиз, «Толибон» ҳукумати TAPI хавфсизлик режасини Туркманистон томонига 2022 йилнинг февраль ойида тақдим этганди. Газ қувурларини ҳимоя қилиш режасининг тафсилотлари ошкор этилмаган.