Афғонистон Россиядан қарийб 1 миллион баррель нефть сўради, деб ёзади «РБК».
«Биз Россияга 1 миллион баррель нефть беришни таклиф қилдик, агар у бундан ҳам кўпроқ юбора олса, унда бу муаммо эмас», — деди Афғонистон саноат ва савдо вазири Нуриддин Азизий.
Шунингдек, унинг таъкидлашича, Афғонистон Россия нефтини бартер бўйича етказиб бериш ҳақида келишиб олишдан манфаатдор. «Биз учун энг муҳими нефть ва газ бўйича лойиҳа бўлган бўларди. Биз бартер савдоси вариантини ҳам кўриб чиқишни истардик, агар Россияда қайсидир афғон маҳсулотига нисбатан эҳтиёж бўлса», — деди вазир.
Москва билан Россия нефти ва газини етказиб бериш ҳақида келишиб олиш режаларини май ойида Афғонистон масалалари бўйича Россиядаги вақтинчалик ишончли вакил Жамол Носир Гарвал маълум қилган эди. «Биз Афғонистон ва Россия ўртасида келишувга эришиб, муайян битимлар имзолашга хайрихоҳмиз», — деган эди у. Дипломатнинг сўзларига кўра, Кобул Москва билан иқтисодий ҳамкорликни ривожлантиришни истайди ва аллақачон бизнесни ривожлантириш масалаларида ва молия соҳасида музокаралар олиб бормоқда.
15 август куни Афғонистон саноат ва савдо вазири Нуриддин Азизий Москва ва Қозонга ташриф буюради. Россиянинг Афғонистондаги элчиси Дмитрий Жирновнинг айтишича, делегацияга иқтисодиётчилар ва молиячилар ҳам киритилган, томонлар нефть, буғдой, ун, кунгабоқар мойи сотиб олиш масаласини муҳокама қилиши керак.
Изоҳ (0)