Ташқи ишлар вазирининг биринчи ўринбосари Бахромжон Аълоев 2 декабрь куни Бирлашган Араб Амирликларининг Ўзбекистондаги элчиси Саид Матар ал-Қамзийни қабул қилди. Бу ҳақда вазирлик матбуот хизмати хабар берди.
Учрашувда икки мамлакат ўртасида сиёсий, савдо-иқтисодий ва инвестициявий алоқаларни ривожлантириш масалалари муҳокама қилинди.
Шу билан бирга, томонлар сўнгги кунларда Ўзбекистон фуқароларининг Бирлашган Араб Амирликлари ҳудудига киришларида кузатилаётган қийинчиликлар билан боғлиқ вазият бўйича фикр алмашди.
Мавжуд ҳолатни имкон қадар қисқа муддатларда ҳал қилиш бўйича тегишли чора-тадбирлар кўришга келишиб олинди.
Абу-Дабига киритилмаган ўзбекистонликлар
Аввалроқ Ўзбекистон фуқаролари номаълум сабабларга кўра БАА ҳудудига киритилмаётгани ҳақида хабар берилганди. 30 ноябрь куни Абу Даби шаҳридаги Шайх Зайд номидаги халқаро аэропортга Тошкент—Абу-Даби йўналиши бўйича Wizz Air авиақатнови орқали учиб келган 31 нафар Ўзбекистон фуқароси номаълум сабабларга кўра амирликлар ҳудудига киритилмаган.
Кейинроқ уларнинг бир қисми Тошкентга қайтиб келган.
Ўзбекистоннинг БААдаги элчихонаси вазият назоратда эканини маълум қилди, бироқ йўловчилар дипломатик миссия вакилларини кўрмаганини ва уларга ҳеч қандай ёрдам кўрсатилмаганини айтган. Тошкентга қайтганларнинг барчаси чипталарни ўз ҳисобидан сотиб олган.
“Қўлга олишлар айнан Абу-Дабида содир бўлмоқда. Биз билан бирга ёки кейинроқ Дубайга учиб келган танишларимиз ҳеч қандай муаммога дуч келмади”, деган Тошкентга қайтиб келган йўловчилардан бири.
Wizz Air вакили Муҳаммадюсуф Муҳаммадусмоновнинг билдиришича, киритилмаган фуқароларнинг барчасига қайтиш чиптаси қилиниб, Ўзбекистонга олиб келиняпти.
Изоҳ (0)