Tashqi ishlar vazirining birinchi o‘rinbosari Baxromjon Aʼloyev 2-dekabr kuni Birlashgan Arab Amirliklarining O‘zbekistondagi elchisi Said Matar al-Qamziyni qabul qildi. Bu haqda vazirlik matbuot xizmati xabar berdi.
Uchrashuvda ikki mamlakat o‘rtasida siyosiy, savdo-iqtisodiy va investitsiyaviy aloqalarni rivojlantirish masalalari muhokama qilindi.
Shu bilan birga, tomonlar so‘nggi kunlarda O‘zbekiston fuqarolarining Birlashgan Arab Amirliklari hududiga kirishlarida kuzatilayotgan qiyinchiliklar bilan bog‘liq vaziyat bo‘yicha fikr almashdi.
Mavjud holatni imkon qadar qisqa muddatlarda hal qilish bo‘yicha tegishli chora-tadbirlar ko‘rishga kelishib olindi.
Abu-Dabiga kiritilmagan o‘zbekistonliklar
Avvalroq O‘zbekiston fuqarolari noma’lum sabablarga ko‘ra BAA hududiga kiritilmayotgani haqida xabar berilgandi. 30-noyabr kuni Abu Dabi shahridagi Shayx Zayd nomidagi xalqaro aeroportga Toshkent—Abu-Dabi yo‘nalishi bo‘yicha Wizz Air aviaqatnovi orqali uchib kelgan 31 nafar O‘zbekiston fuqarosi noma’lum sabablarga ko‘ra amirliklar hududiga kiritilmagan.
Keyinroq ularning bir qismi Toshkentga qaytib kelgan.
O‘zbekistonning BAAdagi elchixonasi vaziyat nazoratda ekanini ma’lum qildi, biroq yo‘lovchilar diplomatik missiya vakillarini ko‘rmaganini va ularga hech qanday yordam ko‘rsatilmaganini aytgan. Toshkentga qaytganlarning barchasi chiptalarni o‘z hisobidan sotib olgan.
“Qo‘lga olishlar aynan Abu-Dabida sodir bo‘lmoqda. Biz bilan birga yoki keyinroq Dubayga uchib kelgan tanishlarimiz hech qanday muammoga duch kelmadi”, degan Toshkentga qaytib kelgan yo‘lovchilardan biri.
Wizz Air vakili Muhammadyusuf Muhammadusmonovning bildirishicha, kiritilmagan fuqarolarning barchasiga qaytish chiptasi qilinib, O‘zbekistonga olib kelinyapti.
Izoh (0)