Қозоғистоннинг Бирлашган Араб Амирликларидаги (БАА) элчихонаси маслаҳатчиси Сакен Мамашнинг рафиқаси Карина Мамаш эри унга ўн йил давомида мунтазам равишда зўравонлик қилаётганини айтди. Бу ҳақда “Немолчи.кз” хабар берди.
Карина Мамаш ўз мурожаатида эри уни, шунингдек, уни кўргани келган опасини яна калтаклаганини айтди.
“Давлатимиздан ёрдам сўрайман. Хавф остидаман, унинг ёнида фарзандларим хавф остида. Турмуш ўртоғимнинг менга нисбатан қилган барча безориликлари учун дипломатик мақомидан маҳрум этилишини ва қамоққа ташланишини истайман. Жисмоний, жинсий, ҳиссий, иқтисодий, маиший, оилавий зўравонлик”, — дейди жабрланувчи.
“Немолчи.кз” маълумотларига кўра, Карина Мамаш ҳозирда касалхонада, чакка қисмига кучли зарбалар туфайли кўриш қобилияти ёмонлашган. Ҳуқуқ ҳимоячилари Сакен Мамаш хотинининг телефонини олиб, унинг опасининг телефонини синдириб ташлагани ва шу тариқа ҳар икки аёлни алоқа қилиш имкониятидан маҳрум қилгани ҳақида хабар берди.
Қозоғистон ТИВ муносабати
Қозоғистон Ташқи ишлар вазирлиги Республикасининг БААдаги элчиси маслаҳатчиси Сакен Мамаш зудлик билан чақириб олинишини маълум қилди.
“Бу ходимни зудлик билан Қозоғистонга чақириб оляпмиз. Кейинчалик унинг иши ҳуқуқ-тартибот идоралари томонидан кўриб чиқилади. У вазирлик лавозимидан озод қилинади”, — деди вазирлик ходими Айбек Смадияров.
15 апрель куни Қозоғистон президенти Қосим-Жўмарт Тўқаев оиладаги зўравонликка қарши курашишга қаратилган қонунларни имзолади. Аёллар ва болаларга нисбатан зўравонликнинг ҳар қандай ҳолати учун жавобгарликни кучайтирувчи нормалар жорий этилмоқда.
Хусусан, қонун уриш ва қасддан баданга енгил шикаст етказганлик учун жиноий жавобгарликни назарда тутади (илгари бунинг учун маъмурий жавобгарлик белгиланган). Соғлиққа қасддан ўртача ва оғир шикаст етказганлик учун жазо кучайтирилади.
Бундан ташқари, болаларга нисбатан жисмоний зўравонлик ва шафқатсиз муносабатда бўлиш билан боғлиқ ишлар, шунингдек, калтаклаш ва соғлиққа енгил зарар етказиш бир йил давомида такроран содир этилса, томонларнинг ярашиш имконияти истисно қилинади.
Қозоғистонда оиладаги зўравонлик учун жиноий жавобгарликка тортиш қонуни собиқ миллий иқтисодиёт вазири Куандик Бишимбаев рафиқаси Салтанат Нукеновани шафқатсизларча қийноққа солиб ўлдирганликда айбланаётгани юзасидан ўтказилаётган суд жараёни фонида маъқулланганди.
Изоҳ (0)