БАА Дуровнинг ҳибсга олиниши сабабли Францияга талаб билан чиқди

Бирлашган Араб Амирликлари Ташқи ишлар вазирлиги Францияни ҳибсга олинган Павел Дуровга БАА фуқароси сифатида барча зарур консуллик хизматларидан фойдаланиш имкониятини беришга чақирди.

“Бирлашган Араб Амирликлари Ле Бурже аэропортида Франция расмийлари томонидан қўлга олинган Амирликлар фуқароси, Telegram ижтимоий тармоғи асосчиси Павел Дуровнинг ишини диққат билан кузатиб бормоқда. Улар Франция ҳукуматига барча зарур консуллик хизматларини зудлик билан тақдим этиш тўғрисидаги талабни етказди”, дейилади хабарда.

Шунингдек, Ташқи ишлар вазирлиги фуқароларининг барча ишларини кузатиш, ҳимоя қилиш ва уларга ғамхўрлик қилиш Бирлашган Араб Амирликлари учун устувор вазифа бўлиб қолишини таъкидлади.

Шу билан бирга, Франция оммавий ахборот воситаларида эълон қилинган маълумотга кўра, Дуров 28 августгача ҳибсда қолади. 

Дуровнинг ҳибсга олиниши

Telegram асосчиси 24 август куни Озарбайжондан Парижга шахсий самолётида борганда Ле Бурже аэропортида қўлга олингани хабар берилганди. У француз ҳуқуқ-тартибот идоралари ходимлари билан Telegramъда кибер ва молиявий жиноятлар масалаларида ҳамкорлик қилишдан бош тортганликда айбланмоқда. Франция полицияси вакилига кўра, Дуров ҳозирда миллий кибержиноятчилик ва фирибгарликка қарши кураш бошқармаси томонидан тергов қилинмоқда. Мессенжер асосчиси ҳамон ҳибсда сақланмоқда.

Telegram компанияси муносабати

Компаниянинг таъкидлашича, Telegram “Европа Иттифоқи қонунларига тўлиқ риоя қилади”, контентни модерация қилиш эса “соҳа стандартларига мос келиб, доимий равишда такомиллаштирилмоқда”. Шунингдек, компания бош директорининг “яшириш учун ҳеч нарсаси йўқлиги ва у мунтазам равишда Европа бўйлаб саёҳат қилиши” айтилган.

Дуров ёки платформа Telegram фойдаланувчиларнинг суиистеъмолликлари учун жавобгар экани ҳақидаги даъволарни Telegram жамоаси “абсурд” деб атаган.

“Бутун дунё бўйлаб қарийб бир миллиард фойдаланувчи Telegram’ни алоқа воситаси ва муҳим маълумотлар манбаи сифатида ишлатади. Биз ушбу вазиятнинг тез орада ҳал этилишини кутмоқдамиз. Telegram ҳар доим сиз билан”, дейилади муносабатда

Франция президенти нима демоқда?

“Павел Дуров ҳибсга олинганидан кейин Франция ҳақидаги ёлғон маълумотларни ўқияпман. Франция сўз ва мулоқот эркинлиги, инновациялар ва тадбиркорликка содиқдир. Telegram раҳбарининг Франция ҳудудида ҳибсга олиниши давом этаётган суд тергови доирасида амалга оширилди”, деди Макрон Х ижтимоий тармоғидаги саҳифасида.

Маълумот ўрнида, Telegram асосчиси Россиядан ташқари, Сент-Китс ва Невис, БАА ва Франция фуқаролигига эга.