20-noyabr kuni O‘zbekiston drama teatrining 56-mavsum ochilishi marosimi tantanali tarzda o‘tkazildi. Unda ko‘plab ustoz san’atkorlar, teatr aktyorlari, shahar ahli va xorijiy mehmonlar qatnashdi. Marosim avvalida teatr tarixiga oid videorolik namoyish etilib, uzoq yillardan buyon yuzlab aktyor-aktrisalarni yetishtirib chiqarayotgan bu maskan haqida nutq so‘zlandi.
“Teatr — ibratxona. Unga yolg‘iz emas, oilaviy kelish kerak, — deydi ochilish marosimiga tashrif buyurgan so‘z ustasi Zokir Ochildiyev. — Farzandlarni bu maskan bilan oshno qilish lozim, ota-ona aytadigan fikrni teatr ta’sirliroq qilib yetkazadi. Yozilmagan bir qoida bor — teatrga spektakl boshlanishidan 30-40 daqiqa avvalroq kelib shu muhitga moslashish kerak. Teatr telefonda gaplashadigan yoki g‘iybatlashib o‘tiradigan joy emas. Shundagina bu dargohdan ma’naviy ozuqa olib ketsa bo‘ladi. Bir marta kelsangiz bas, yana qayta qanday kelganingizni bilmay qolasiz — teatr insonni shunday sehrlab qo‘yadi”.
Ochilish marosimida Uilyam Shekspir asari asosida drama teatrining bosh rejissyori Olimjon Salimov tomonidan sahnalashtirilgan “Romeo va Julyetta” spektakli namoyish etildi.
Dunyo sahnalarida eng ko‘p ko‘rsatilgan pyesalar safiga kirgan va o‘zbek tiliga she’riy uslubda tarjima qilingan durdona asar shunday boshlandi:
“…Shu baxtsiz yoshlarning muhabbatini,
O‘jar xonadonlar adovatini,
Alamli sevgining musibatini,
Ko‘rsatib beramiz sizga bu oqshom”.
Ushbu mavsum barcha teatr san’ati ixlosmandlarini yorqin spektakllar va unutilmas hissiyotlar bilan kutib oladi.
Eslatib o‘tamiz, prezident Shavkat Mirziyoyev 22-noyabr kuni madaniyat va san’at sohasini rivojlantirish, xususan, teatrlarning jamiyat madaniy hayotidagi ahamiyatini oshirish va ular faoliyatini yanada qo‘llab-quvvatlashga oid takliflar taqdimoti bilan tanishgandi. Unga ko‘ra, 2025-2030-yillarda teatrlarda “Milliy qahramon” va “Inson qadri uchun” mavzularida 32 ta turkum spektakllar yaratish hamda teatr dramaturglari uchun Mahmudxo‘ja Behbudiy, yosh rejissyorlar uchun Bahodir Yo‘ldoshev nomidagi mukofotlarni ta’sis etish, “Nigoh” ijodiy loyihasini yo‘lga qo‘yish, milliy akademik musiqa san’ati bo‘yicha kompozitorlar tanlovini o‘tkazish taklif etilgan.
Izoh (0)