Айни вақтда Тошкентда Иқтисодий ҳамкорлик ташкилотининг (ИҲТ) саммити бўлиб ўтмоқда. Саммит доирасида Шавкат Мирзиёев Энергетика вазирлари кенгашини таъсис этишни таклиф қилди.
Давлат раҳбарининг таъкидлашича, бу ҳамкорлик масалаларини муҳокама қилиш ва ишларни тизимли асосда олиб бориш учун зарур. Шунингдек, президент Ўзбекистонда “яшил водород” ишлаб чиқаришда илк қадамлар қўйилаётганини маълум қилди.
Энергетика вазири Жўрабек Мирзамаҳудов “Ўзбекистон 24” телеканалига берган интервьюсида мамлакатда 2023 йилнинг ўзида 2 гигаваттга яқин янги қайта тикланувчи энергия қувватлари ишга туширилишини билдирди.
“Бу — қуёш, шамол ва гидроэнергетика лойиҳалари. Йил якунига қадар 80 миллиард кВт/соат электр энергия ишлаб чиқарадиган бўлсак, кейинги йилда 5,5 миллиард кВт/соат янги лойиҳалардан тушадиган қувватлар ҳисобидан амалга оширилади. 2030 йилга бориб 120 миллиард кВт/соат электр энергия ишлаб чиқаришни режалаштираётган бўлсак, шунинг 40 фоизини қайта тикланувчи энергия манбалари ташкил этади”, — дейди Мирзамаҳмудов.
Шунингдек, энергетика вазирининг сўзларига кўра, Боку шаҳрида “Яшил энергия” бўйича Иқтисодий ҳамкорлик ташкилотига аъзо давлатларнинг офиси ташкил этилади. Ушбу офисда технологияларнинг ривожланиши, энергия балансдаги улуши, “яшил энергия” бўйича ишлар мувофиқлаштирилиб, истиқболли бозорларга биргаликда чиқиш режалаштирилган.
Изоҳ (0)