Қозоғистон Республикаси ташқи ишлар вазири Мурат Нуртлеу Яқин Шарқдаги вазият бўйича ҳукумат позицияси қандайлигини маълум қилди. Бу ҳақда “Нур.кз” хабар берди.
Сиёсатчи Араб давлатлари лигаси (АДЛ) ва Ислом ҳамкорлик ташкилоти (ИҲТ)нинг Ар-Риёддаги навбатдан ташқари қўшма саммитида Фаластин халқининг тинч ва хавфсиз келажагини таъминлашнинг ягона йўли БМТ резолюцияларига мувофиқ “Икки халқ учун икки давлат” формуласи эканини айтди.
Мурат Нуртлеу “Қозоғистон фаластинликларнинг ўз тақдирини ўзи белгилаш ва халқаро миқёсда тан олинган Фаластин давлатини яратишга бўлган қонуний ҳуқуқларини тўлиқ қўллаб-қувватлашини” таъкидлади.
“Қозоғистон Ғазо секторидаги жанговар ҳаракатларни зудлик билан тўхтатишга чақириб, Ислом ҳамкорлик ташкилотига аъзо давлатлар билан бирдамлик кўрсатган ва кўрсатишда давом этмоқда”, — деди вазир.
Шунингдек, у Қозоғистоннинг Ғазо секторида бўлган 150 дан ортиқ фуқаролари Рафаҳ назорат-ўтказиш пункти орқали чиқа олмаслигидан хавотир билдирди.
“Фурсатдан фойдаланиб, Миср ва барча манфаатдор томонларни Қозоғистон фуқаролари, уларнинг оила аъзолари ва бошқа хорижликларни Ғазо секторидан эвакуация қилишга рухсат беришга чақираман. Биз бу фуқаролар Рафаҳ орқали ўтишга рухсат берилган заҳоти Қозоғистонга зудлик билан эвакуация қилинишини таъминлаш учун чоралар кўрдик”, — деди у.
Изоҳ (0)