"Шавкат Мирзиёев ҳар қандай халқаро майдонларда дунё эътиборини Афғонистондаги вазиятга қаратиб келмоқда" — Эксперт Баҳром Сотиболдиев

Тошкент шаҳрида 9 ноябрь куни Иқтисодий ҳамкорлик ташкилотига аъзо давлатларнинг 16-саммити бўлиб ўтди.

Тадбирда Озарбайжон, Эрон, Қирғизистон, Тожикистон, Туркия, Туркманистон, Покистон, Қозоғистон делегациялари раҳбарлари ҳамда ИҲТ бош котиби Хусрав Нозирий иштирок этди. Бироқ ташкилот аъзоларидан бири ҳисобланган Афғонистон томонидан вакиллар қатнашмади. Стратегик ва минтақалараро тадқиқотлар институти бўлим бошлиғи Баҳром Сотиболдиев “Дарё”га берган интервьюсида бунинг сабабини тушунтирди.

Баҳром Сотиболдиевнинг айтишича, саммитда Афғонистон вакиллари иштирок этмаган бўлса-да, мамлакат келажаги доим муҳокамалар диққат марказида туради.

“Президент Шавкат Миромонович ҳар қандай халқаро майдонларда, албатта, Афғонистон масаласига алоҳида урғу бериб, мамлакатни дунё сиёсатининг кун тартибидан тушиб қолмаслиги учун дунё эътиборини Афғонистондаги вазиятга қаратиб келмоқда. Афғонистондан вакиллар саммитда иштирок этмаётганининг сабаби, биламиз, у ерда ҳозир муваққат ҳукумат. Дунё ҳамжамияти томонидан расмий тан олинмаган.

Биз юқорида айтдик, янги транспорт коммуникация йўлаклари тўғрисида. Марказий Осиёни Жанубий Осиё билан боғлайдиган асосий йўналишлар Афғонистон ҳудудидан кесиб ўтади. Ва албатта, Афғонистоннинг ИҲТ доирасидаги лойиҳалари, иштирокчи бўлиши назарда тутиляпти. Сабаби агар биргалашиб, ташкилот доирасидаги давлатлар саъй-ҳаракатини мувофиқлаштириб, Афғонистоннинг халқи тушиб қолган оғир иқтисодий аҳволдан чиқарилмаса, бу мамлакатдаги оғир ҳолат, хавф-хатарларнинг сони ва кўламининг кенгайиб боришига олиб келиши мумкин”, — деди мутахассис.

Шавкат Мирзиёев саммитда иштирок этаётган барчани афғон халқига гуманитар ёрдам кўрсатишни кўпайтиришга, ушбу мамлакатдаги ўткир ижтимоий-иқтисодий муаммоларни жамоавий масъулият ва мақбул механизмлар асосида ҳал этишга чақирди.

“Асрлар давомида бизга ён қўшни бўлган кўпмиллатли Афғонистон халқини бугунги мураккаб муаммолари қаршисида ёлғиз қолдириб бўлмайди. Ушбу мамлакатни минтақавий интеграция жараёнларига фаол жалб этиш барқарор тараққиётимизнинг ажралмас ва зарурий шартидир.

Барчангизни афғон халқига гуманитар ёрдам кўрсатишни кўпайтиришга, ушбу мамлакатдаги ўткир ижтимоий-иқтисодий муаммоларни жамоавий масъулият ва мақбул механизмлар асосида ҳал этишга чақираман”, — деди Шавкат Мирзиёев.