O‘zbekistonning Islom hamkorlik tashkilotidagi doimiy vakili, elchi Nodirjon Turg‘unov IHT bosh kotibi Husayn Ibrohim Tohaga ishonch yorliqlarini topshirdi. Bu haqda “Dunyo” AA xabar berdi.
IHT bosh kotibi doimiy vakilning ishonch yorliqlarini qabul qilar ekan, uni ushbu lavozimga kirishishi bilan tabrikladi va masʼuliyatli missiyasini amalga oshirishda muvaffaqiyatlar tiladi.
Uchrashuvda tomonlar O‘zbekiston va IHT o‘rtasidagi hamkorlikning hozirgi holati va istiqbollarini muhokama qildi. Tomonlar, shuningdek, taʼlim, yoshlarni qo‘llab-quvvatlash va innovatsiyalar kabi muhim yo‘nalishlarda o‘zaro hamkorlikni faollashtirishdan o‘zaro manfaatdor ekanliklarini bildirdi.
Bosh kotib O‘zbekistonning islom sivilizatsiyasi, ilm-fani va madaniyati rivojiga qo‘shgan salmoqli hissasini taʼkidlab, mamlakat tarixan islom olamining ilmiy kashfiyotlar, falsafiy tafakkur va maʼnaviy meros markazi bo‘lganini alohida taʼkidladi.
Nodirjon Turg‘unov 2024-yilning mart oyida O‘zbekistonning Saudiya Arabistonidagi elchisi etib tayinlangandi.
Nodirjon Turg‘unov haqida
49 yoshli diplomat Toshkent davlat sharqshunoslik institutini (hozirgi Toshkent davlat sharqshunoslik universiteti) tamomlagan. Mehnat faoliyatini maktabda o‘qituvchilikdan boshlagan, xususiy tuzilmalarda tarjimon sifatida, shuningdek, O‘zbekiston xorijiy mamlakatlar bilan do‘stlik va madaniy-maʼrifiy aloqalar jamiyatlari kengashida ishlagan.
Izoh (0)