“ИҲТ сўнгги йилларда анча фаоллашди” — эксперт Баҳром Сотиболдиев

Охирги 5 йилда Иқтисодий ҳамкорлик ташкилотига аъзо давлатлар ўртасидаги ҳамкорлик анча жадаллашган. Бу ҳақда Стратегик ва минтақалараро тадқиқотлар институти бўлим бошлиғи Баҳром Сотиболдиев “Дарё”га берган интервьюсида маълум қилди.

Баҳром Сотиболдиевнинг айтишича, ҳозир Марказий Осиёда янги вазият юзага келган.

“Охирги 5 йилда Иқтисодий ҳамкорлик ташкилотига аъзо давлатлар ўртасидаги савдо айланмаси ошди, янги транспорт коридорлари ташкил этилмоқда, сув, энергетика ва бошқа ўнлаб соҳаларидаги ҳамкорлик кучайиб бормоқда. Йирик иқтисодий қўшма лойиҳалар амалга оширилмоқда. Чегараларда делимитация ва демаркация масалалари ҳал қилинмоқда, аҳолининг қўшни давлатларга борди-келдиси енгиллашди. Натижада Марказий Осиёда бутунлай янги геоиқтисодий ва геосиёсий вазият юзага келди”, —деди у.

Шунингдек, мутахассис Афғонистон томони саммитда нега иштирок этмаганининг сабабига тўхталди.

“Афғонистон вакиллари саммитда иштирок этмасада, улар доим муҳокамалар диққат марказида туради. Президент Шавкат Миромонович ҳар қандай халқаро майдонларда албатта Афғонистон масаласига алоҳида урғу бериб, мамлакатни дунё дунё сиёсатининг кун тартибидан тушиб қолмаслиги ҳамда дунё эътиборини Афғонистондаги вазиятга қаратиб келмоқда. Афғонистондан вакиллар саммитда иштирок этмаётганининг сабаби биламиз у ерда ҳозир муваққат ҳукумат. Дунё ҳамжамияти томонидан расмий тан олинмаган. Лекин бу Афғонистоннинг ИҲТ доирасидаги фаолияти тўхтатилди дегани эмас.

Биз юқорида айтдик, янги транспорт коммуникация йўлаклари тўғрисида. Марказий Осиёни Жанубий Осиё билан боғлайдиган асосий йўналишлар Афғонистон ҳудудидан кесиб ўтади. Ва албатта, Афғонистонни ИҲТ доирасидаги лойиҳалари, иштирокчи бўлиши назарда тутиляпти. Сабаби агар биргалашиб, ташкилот доирасидаги давлатлар саъй-ҳаракатини мувофиқлаштириб, Афғонистоннинг халқи тушиб қолган оғир иқтисодий аҳволдан чиқармасак, бу мамлакатдаги оғир ҳолат, хавф–хатарларнинг сони ва кўламининг кенгайиб боришига олиб келиши мумкин. Шунинг учун Афғонистон бу саммитда иштирок этяпти, деб айтсак бўлади”, — деди Баҳром Сотиболдиев.