Сирдарё туманида яшовчи Феруза Хидированинг “Дарё”га маълумот беришича, туман тиббиёт бирлашмаси туғруқ бўлимида унинг эндигина туғилган жияни тиббиёт ходимларининг нотўғри укол қилиши оқибатида вафот этган. Туман прокуратураси ҳолат бўйича жиноят иши қўзғатмаган. Марҳум боланинг яқинларига ҳам ҳеч қаерга мурожаат қилмасликни, муаммони ҳеч кимга айтмасликни маслаҳат берган.
Сўнгги пайтларда бизнинг туманимиздаги шифохонада чақалоқлар ўлими жуда кўпайди. Айнан бизда ҳам шундай бўлди. Менинг эндигина туғилган жиянимга уйга жавоб беришидан аввал онасига “келинг, уколга олайлик, кечки пайт олиши керак бўлган глюкозаси бор”, дея олиб, 2-3 дақиқани ичида қий-чув бўлиб кетади. Чақалоғимизнинг онаси воқеа жойига бориб қараганда боланинг бир томони кўм-кўк, иккинчи томони эса оқариб кетган. Нега бундай бўлди деса, биз билмаймиз, болангизнинг ўзи шунақа экан деган. Укол қилдингизми деганда, ҳали укол қилишга улгурмадик дейишган. Шундан сўнг ҳамширалар олдига катта докторлар етиб келишган. Боланинг юраги тўхтаб қолган бўлган, дейди Сирдарёдаги “роддом”дан ўлик чиққанини айтган мурожаатчи.
Феруза Хидировага кўра, докторлар ўлик болани қай ҳолатда топширайлик деб сўрашган.
Докторлар бизга болани нима қилайлик олиб кетасизларми ёки моргга берайликми, моргга топширсак уни тилиб, кесиб ташлашади деб жудаям қўрқинчли гапларни гапиришди. Кейин болани ўраб, бизга беришди. Укамни чақирсам, у соат ўн яримларда фарзандини кўриб кетганини, у тирик ва яхши ҳолатда эканини айтиб, ҳайрон қолди. Бола қандай қилиб бундай қорайиб кетади, бола меники эмас деди. Шу пайт дўхтирлар бизни бир хонага олиб кириб, узр кечирасизлар, кечирим сўраймиз дейишди. Укам нега кечирим сўрайсизлар, нотўғри укол қилиб қўйдиларингизми, фақат тўғрисини айтинг деди. Улар йўқ биз укол қилмадик деб туриб олишди. Шундан сўнг ўлик ҳақида ИИБга хабар бериб, болани экспертизага олиб кетдик. Экспертиза ходимлари дастлаб, “ундай эди, бундай эди”, дея гапиришди. Кейинчалик эса ҳам дўхтирларнинг айби бўлган, нотўғри укол қилишган, болани шок ҳолатига олиб келишган дейишди. Шундан сўнг болани кўмиб, прокуратурага борсак, Азиз исмли прокурор қўйинглар энди ёзув-чизув қилманглар, ўзим сизларга ёрдам бераман деб воқеа ҳақида ҳеч кимга айтмаслигимизни маслаҳат берди, дейди мурожаатчи.
Жияни ўлимининг сабабини билишга уринаётган аёлнинг айтишича, “роддом”дан чиққан чақалоқ ўлими бўйича туман прокуратураси жиноят иши қўзғатмаган.
Келинимизни вақтида операция қилишганида боласи ҳам ўлмасди. Докторларга қайта-қайта айтдим. Келинимиз олдин ҳам операция йўли билан туғган. Уни операция қилиб, тезроқ кўзи ёришига ёрдам беринглар дедим. Лекин унашмади. Шифокорлар воқеа ҳақида ҳуқуқни муҳофаза қилувчи органларга ҳам хабар бермаган экан. Ўзимиз 102 қилиб, воқеадан уларни хабардор қилдик. Аммо прокуратура ҳалиям ишга эътиборсиз қараяпти, дейди у.
Мурожаатчининг қўшимча қилишича, унинг жияни вафотидан сўнг “роддом”дан яна бир қўшнисининг фарзанди ўлик ҳолатида чиққан.
Воқеа ҳақида прокурорга хабар берганимдан сўнг, у кимлар биландир гаплашиб, “бир ҳафтада бешта ўлик бўлди, бу роддомми ёки ўликхонами дея жаҳл қилди”, дейди мурожаатчи аёл.
Аввалроқ Бўкадаги “роддом”дан икки ўлик чиққани, она ва унинг эндигина туғилган қизалоғи шифокорлар қўлида жон бергани хабар берилганди.
Изоҳ (0)