«Дарё» таҳририятига Қашқадарё вилояти, Миришкор туманининг Жейнов қишлоғида яшовчи Низом Абдуллаевдан мурожаат келиб тушди. Мурожаатчи 38 ёшли ҳомиладор синглиси туғуруқхонага ўз оёғи билан кириб бориб, шифокорларнинг уқувсизлиги оқибатида вафот этганини айтмоқда. Низом Абдуллаевнинг сўзига кўра, туманда апрель–июнь ойлари давомида 3 нафар аёл туғуруқ пайтида шифокорлар айби билан вафот этган.
Воқеа тафсилотларини ўрганган «Дарё» мухбири Отабек Қўлдошевнинг аниқлаштиришича, Низом Абдуллаевнинг синглиси, 38 ёшли Нодира Абдуллаева 25 апрель куни Миришкор туман тиббиёт бирлашмасида бачадон ёрилиб кетиб, кўп қон кетиши натижасида 7 соатлик операциядан сўнг, кеч соат 23:00 да жони узилган.
— Синглим «роддом»га ўзи юриб кирган, энг қизиғи шифокорлар бачадони ёрилиб, кўп қон кетган деган «бемор» синглим юқори қаватга ҳам ўзи чиққан, — дейди Низом Абдуллаев. — Унинг аҳволини текширган шифокор Жаҳонгир Камолов дастлаб ўзининг ҳам, туғилажак фарзандининг ҳам аҳволи яхши эканлигини айтиб, ўзи туғиши лозимлигини билдирган. Синглим эса 13 йилдан бери туғуруқ жараёнини бошидан кечирмаганини, қўрқаётганини айтиб операция қилишларини сўраган. Аммо шифокор ўзи туғсин деб вақтида операция қилмаган. Ана шу вақтида қилинмаган операция синглимнинг ўлимига сабаб бўлмоқда.
Марҳума Нодира Абдуллаеванинг опаси Дилором Абдуллаева «Дарё» мухбири билан суҳбати давомида синглиси 5–8 апрель кунлари шифокор Жаҳонгир Камоловнинг назорати остида туман тиббиёт бирлашмасида даволаниб чиққанини, ўша пайтда ҳам синглиси шифокорга операция қилишлари лозимлигини бот-бот такрорлаганини айтмоқда.
— Синглим 5–8 апрель кунлари туман шифохонасида даволаниб чиқди, — дейди Дилором Абдуллаева. – Ўша пайтда ҳам шифокори Жаҳонгир Камоловга ўзи туғишга кўзи етмаётганини, операция қилишлари кераклигини айтарди.
Дилором Абдуллаеванинг маълум қилишича, синглиси Нодира Абдуллаева ўлимидан бир кун олдин — 24 апрель куни яна шифохонага, кўрикка борган. Бемор аҳволини назоратдан ўтказган Жаҳонгир Камолов Нодира Абдуллаевага фарзанди ҳам, ўзи ҳам яхши эканлигини, агар оғриқ бермаса 6 майгача кутишларини ва ўша куни келишини тайинлаган.
— 25 апрель куни туш пайти келиним қорнида оғриқ турганини, шифохонага бориши кераклигини айтиб, додлай бошлади, — дейди марҳуманинг қайнонаси Гулчеҳра Абдуллаева. – Шу заҳоти тез ёрдам чақирдик.
Аниқланишича, тез ёрдам машинаси 13:48 да чақирилган бўлса, чақирув жойига 13:52 да чиқиб кетган. Тез ёрдам машинасида Жейнов шифохонасининг акушер-гинекологи Назокат Раҳимова, ҳамшира Ҳилола Алламуродова ҳамда фелдшер Завқиддин Муродовлар келган ва беморга ёрдам кўрсатган.
— Бемор Нодира Абдуллаева бизнинг туғуруқ бўлимга 25 апрель куни 15:35 да олиб келинди, — дейди Миришкор тумани тиббиёт бирлашмаси туғуруқ бўлими бошлиғи, шифокор Жаҳонгир Камолов. – Сўнгра УЗИга туширдик. Шунда бола нафас олмаётгани, нобуд бўлганлиги аниқланди. Беморнинг бачадони ҳам ёрилиб, қон кетгани маълум бўлди.
Шу ерда воқеанинг бир жиҳатига эътибор қаратишингизни сўраган бўлардик. Марҳум бемор яқинлари ва ҳатто шифокорлар ҳам бемор тез ёрдам машинасида олиб келинганда, юқори қаватга ўз оёғи билан чиққанини, ҳатто туғилажак фарзанди учун аталган кийим-кечаклар солинган сумкани ҳам ўзи кўтариб чиққанини билдиришган. Қизиқ, бачадони ёрилиб, қон кетаётган ҳомиладор аёл мустақил равишда ҳаракатланишдан ташқари, зинапоялардан тепа қаватга чиқишни эплай олармикин?
Мутахассис шифокор Чўлли Чориевнинг айтишича, бачадони ёрилиб, қон кетган бемор юқори қаватга ўзи юриб чиқолмайди.
Миришкор тумани тиббиёт бирлашмасининг Жейнов шифохонаси врач акушер-гинекологи Назокат Раҳимованинг маълумот беришича, 25 апрель куни биринчи ёрдам кўрсатилган бемор Нодира Абдуллаевнинг аҳволи қониқарли даражада бўлган. Соғлиғида хатар бўлмаган. Беморда туғуруқ жараёни бошлангани сабаб, қалтираш ва қорнида оғриқ борлиги аниқланган. Ва шифохона тез ёрдам машинасида туман тиббиёт бирлашмасининг туғуруқ бўлимига юборилган.
Демакки, ҳар иккала томоннинг ҳам ўзини оқлаши бемор Нодира Абдуллаеванинг бачадони йўлда ёрилган деган тахминни юзага келтиради. Бинобарин шундай экан, яна савол туғилади: Тез ёрдам машинасидаги мутахассислар бемордаги ўзгаришни ҳам сезмайдиган даражада нўноқмиди? Ўзи тез ёрдам машинасида бемор манзилга боргунга қадар унинг аҳволидан хабар олиб борадиган мутахассис бор бўлганмикин?
Маълум бўлишича, 15:35 да туғуруқхонага олиб келинган бемор Нодира Абдуллаева юқори қаватга ўзи чиқиб, туғуруқ жараёнига тайёрланган. Шифокор томонидан чақирилган УЗИ аппарати 20 дақиқада етиб келгач, бемор ҳомиласи текшириб кўрилган. Текшириш натижасида ҳомила нафас олмаётгани аниқлангач, операцияга тайёрланган. Жаҳонгир Камоловнинг айтишича, операция 16:00 да бошланиб, кечаси соат 23:00 гача давом этган. Операцияда вилоятдан келган 4 нафар мутахассис ҳам иштирок этган. Аммо беморнинг ҳаётини сақлаб қолиш имкони бўлмаган. Беморда 23:00 да ўлим ҳолати қайд этилган.
— Синглимни туғуруққа тайёрлашдан олдин ҳам, илгари даволанишга келганда ҳам аҳволи ҳамда туғилажак фарзанди ҳам яхши дейишганди, демакки шифокорларнинг айби билан, операцияни кечиктиргани учун ҳам синглим вафот этган-да, — дейди Низом Абдуллаев. – Бу ҳақиқатни шифокор Жаҳонгир Камоловнинг ўзи ҳам тан олиб, «Ака менинг айбим операцияни кечиктирганим бўлди», деб айтганди.
Низом Абдуллаев томонидан «Дарё» мухбирига тақдим қилинган аудиоёзувда шифокор Жаҳонгир Камолов эканлиги айтилаётган суҳбатдош хато қилганини айтиб, марҳума яқинларидан узр сўрайди.
Журналистик суриштирувларимиз давомида Низом Абдуллаев айтаётган оналар ўлими қачон қайд этилганини аниқлаштириш мақсадида вилоят прокуратурасига мурожаат қилдик. Минг таассуфки, 19 июль куни берилган сўровимизга вилоят прокуратурасидан 1 август ҳолатида ҳам жавоб бўлмади. Жавоб олиш мақсадида қилган такрорий қўнғироқларимиз ҳам самара бермади.
Низом Абдуллаев берган маълумотлар бўйича аниқлаштирганимизда марҳума Нодира Абдуллаевадан кейинги она ўлими 9 июнь куни содир этилган бўлиб, вафот этган она туманнинг «Булуч» қишлоғида яшовчи 30 ёшли Дилафруз Бекмуродова эканлиги маълум бўлди. 19 июнь куни эса «Чандир» қишлоғида яшовчи 21 ёшли ҳомиладор Алиса Холжаева ҳам туман тиббиёт бирлашмасида жон беради. Марҳума Алиса Жолжаеванинг акаси Амир Холжаевнинг айтишича, биринчи фарзандига ҳомиладор синглиси 2 кун давомида Чандир шифохонасида ушлаб турилган. Беморнинг аҳволи оғирлашгач, шифокорлар ҳомиладор аёл яқинларига беморни туман марказига олиб боришларини айтган. Шифохонадан тез ёрдам машинаси ҳам берилмагач, аҳволи оғирлашган ҳомиладор аёл кўчадан тутиб келинган таксида туғуруқхонага олиб борилган. Аммо шифокорлар кеч олиб келибсиз деган. Ҳолбуки, бемор 2 кун давомида қишлоқ шифохонасида шифокорлар назоратида бўлган. Кечиктириб олиб келинган ҳомиладор аёл операциядан сўнг, 8 кун комада ётган ва вафот этган.
Мурожаатчи Низом Абдуллаев айтган 3 нафар ҳомиладор аёлнинг бевақт ўлими сабабаларини билиш мақсадида вилоят прокуратурасига мурожаат йўлладик. Аммо прокуратура ҳар учала ҳолат бўйича ҳам лом-лим демади.
Изоҳ (0)