Тошкент вилоятининг Паркент туманида болалар мактабга жар ёқалаб қатнаётгани акс этган суратлар ижтимоий тармоқларда тарқалиб, кескин муҳокамаларга сабаб бўлди. Туман ҳокимлиги бунга муносабат билдирди.
Унда айтилишича, расмлар туманнинг Чанги қишлоғи «Нуробод» маҳалласи Обишер кўчасида олинган. Ушбу кўчада 14 та хонадон мавжуд. Кўча 2018 йилда ташкил этилган. Ўқувчилар қийинчилик билан юраётган йўл маҳаллий аҳоли томонидан ҳашар йўли билан қурилган, аммо 2022 йил баҳорида давомий ёғингарчиликлар сабабли йўлнинг катта қисмига жиддий зарар етган.
Бу кўчадан 8 нафар мактаб ўқувчиси Ҳисорак қишлоғида жойлашган 29-умумтаълим мактабига қатнашади. Ушбу мактабга бориш учун муҳокамаларга сабаб бўлган расмларда кўрсатилган йўлдан ташқари, қўшимча хавфсиз йўл ҳам мавжуд. Обишер кўчаси билан мактаб орасидаги масофа 1,3 км ни ташкил этади.
«Туман ҳокимлиги мутасаддилари ушбу йўл ички йўллар балансига кирмаганлиги сабабли лойиҳа-смета асосида ички йўллар балансига киритилишини ҳамда қурилиш ишларига малакали мутахассислар жалб қилинишини, шунчаки шағал ташлаш орқали муаммога узил-кесил ечим топиб бўлмаслиги, ёмғирли мавсумларда бундай ҳолатлар яна такрорланиши мумкинлигини маълум қилади.
Қишлоқдаги бу вазият туман ҳокимлигининг тўлиқ назоратига олинган ва қурилиш ишлари учун лойиҳалаштириш ишлари бошланган. 2022 йил сўнгига қадар бу масалага ижобий ечим топилади», — дейилади хабарда.
Мавзуга доир:
Изоҳ (0)