Қашқадарё вилоятининг Қарши шаҳрида жойлашган “роддом”лардан бири танқид қилиниб, мазкур муассасада ҳомиладор аёллар шифохона коридорида даволанишга мажбур бўлаётгани, “роддом”да давлат томонидан берилиши лозим бўлган дори-дармонларни сотиб олишга мажбур қилишаётгани айтилган хабарлар тарқалди. Вилоят Соғлиқни сақлаш бошқармаси мазкур ҳолатга эътибор қаратди.
“Аниқланишича, мазкур ҳолат Қарши шаҳар туғуруқхонасида эмас, Қашқадарё вилояти перинатал марказида тасвирга олинган. Вилоят перинатал марказида 200 даволаш ўрни бўлишига қарамасдан бир кунда ўртача 285-300 нафаргача беморга тиббий хизмат кўрсатилиб, ўртача 30-35 та жарроҳлик амалиёти бажарилган”, — дейилади бошқарма ахбороти аввалида.
Таъкидланишича, Қарши шаҳар туғуруқхонаси санитария меъёрлари талаблари асосида жорий зарарсизлантириш тадбирлари амалга оширилаётганлиги сабабли икки кунга ёпилган бўлиб, ушбу туғуруқхона беморларига вилоят перинатал марказида ёрдам кўрсатилмоқда.
“Шу сабабли мана шундай мураккаб шароитда, ортиқча юклама билан меҳнат қилаётган тиббиёт ходимларини ‘тоза ўзидан кетган’, ‘валломат’, ‘ўзига хон, ўзига бек’ тарзида маломат қилиш эмас, балки фидойилар деб аташ ўринли бўлади. Видеотасвирда акс этган, муолажа олаётган бемор шифохона коридорида эмас, реанимация бўлимининг бир қисмидаги ўринга ётқизилган ва назоратга олинган. Бу ерда беморларга босқичма-босқич тиббий хизмат кўрсатилади. Дори-дармон рецептлари масаласи ҳам юқорида қайд этилган ортиқча юклама билан боғлиқ. Марказда бўлмаган дори-дармонлар беморнинг яқинлари томонидан келтирилмоқда”, — дейди мазкур вазиятга изоҳ берган масъуллар.
Қўшимча қилинишича, вилоят перинатал марказининг асосий мақсади вилоятда оналар ва гўдаклар ўлими ҳолатларини камайтириш, сифатли ихтисослаштирилган, юқори технологияли ва тиббий хизматни кўрсатиш, эътиборга лойиқ ҳомиладор аёлларга ҳамда муддатига етмай, оғир туғилган чақалоқларга акушерлик ва гинекологик ёрдамни ўз вақтида кўрсатишдан иборат.
“Айнан шу жиҳати билан у бошқа туғуруқ муассасаларидан фарқланади, яъни бу ерга ҳомиладор аёллар одатдаги эмас, муаммоли вазиятларда келтирилади. Муассаса фаолиятига баҳо берилганида бу жиҳат алоҳида ҳисобга олиниши зарур. Айни пайтда вилоятимизда репродуктив марказ, скрининг маркази, шаҳар туғуруқхонаси, вилоят перинатал маркази, вилоят болалар кўп тармоқли тиббиёт маркази сингари бир қатор муассасаларни бирлаштирадиган ‘Она ва бола’ кластери қурилиши якунланмоқда. Президентимиз Шавкат Мирзиёевнинг қашқадарёлик сайловчилар билан учрашувида қайд этилганидек, келгусида вилоятда жами 550 ўринли замонавий туғуруқ комплекслари қурилади”, — дейилади вилоят Соғлиқни сақлаш бошқармаси ахборотида.
Бошқарма ахборот хизмати, шунингдек, беморнинг (айниқса туғуруқхона шароитида) рухсатисиз уни видеотасвирга олиш ва ижтимоий тармоқларда бу тасвирларни эълон қилиш, шунингдек, асослантирилмаган маълумотларни тарқатиш қонунга зид ва тегишли тартибда жавобгарликка сабаб бўлишини эслатиб ўтган.
Изоҳ (0)