Шавкат Мирзиёев раислигида 7 апрель куни кун тартибидаги масалалар юзасидан видеоселектор йиғилиши бошланди. Бу ҳақда Президент матбуот котиби хабар қилди.
«Бугун муҳокама қиладиган учта масаламиз бевосита инсон қадри билан боғлиқ, халқимизни рози қилишга қаратилган. Уларни бажармасликка ҳеч қайси раҳбарнинг ҳаққи йўқ. Кун тартибидаги биринчи масалада ички йўллар сифатини яхшилаш бўйича аниқ вазифаларни муҳокама қиламиз.
‘Ташаббусли бюджет’ портали орқали аҳолидан тушган 20 мингта ёки жами таклифларнинг 25 фоизи ҳам ички йўлларни яхшилаш билан боғлиқлиги масаланинг долзарблигини кўрсатмоқда», — деган давлат раҳбари.
Бу борада Андижон тажрибаси кўрсатиб ўтилган. Вилоятдаги цемент ишлаб чиқарувчи корхоналар томонидан кластер ташкил этилиб, олис ва чекка маҳаллалардаги 23 километр қум-шағал йўллар цемент-бетон қопламага ўтказилган. Ушбу 31 та маҳаллада асфальт-бетон ўрнига цементдан фойдаланиш орқали қурилишдан 600 миллион сўм иқтисод қилинган. Бу ишларнинг ҳисобига 350 минг долларлик битум импорти учун маблағ тежалган. Кластер ўзи қурган йўлларни 10 йил давомида кафолатли сақлашни зиммасига олган.
Изоҳ (0)