Андижон вилоятининг Қўрғонтепа туманини 10 кун бошқарган ёш ҳоким ташаббуси билан ОТМда таҳсил олаётган 4 нафар талабанинг бир йиллик тўлов-шартнома пуллари тўлаб берилган. Бу ҳақда туман ҳокимлиги ахборот хизматига таяниб, «Дарё» мухбири Умиджон Мамарасулов маълум қилди.
Қўрғонтепа туманини 10 кун бошқариш ҳуқуқини қўлга киритган ёш ҳоким Нодирбек Қаҳҳоров фаолияти давомида маҳаллаларда уюшмаган ёшлар билан учрашувлар ўтказиб, уларнинг муаммо ва таклифларини эшитган ҳамда аксарият мурожаатларни жойида ҳал этган.
Мурожаат қилганлар орасида «темир дафтар», «ёшлар дафтари»га киритилган ижтимоий ҳимояга муҳтож оилаларнинг фарзандлари ҳам борлигини инобатга олган ёш ҳоким 4 нафар талабанинг бир йиллик тўлов-шартнома пулларини тўлаб беришда ташаббус кўрсатган.
Шунингдек, «ёшлар дафтари»га киритилган 5 нафар ёшнинг даволаниши учун 9 миллион сўмдан ортиқ моддий ёрдам ажратилган. Куни кеча туман раҳбарлари ушбу ёшларнинг хонадонларига бориб, шартнома пули тўлангани ҳақидаги ваучерларни топширган.
«Уч нафар фарзандим вилоятимиздаги олий таълим муассасаларида таҳсил олади. Карантин туфайли уларнинг шартнома пулларини тўлашда қийналиб қолдик. Ўтган ҳафтада вилоят ҳокими томонидан тайинланган ёш ҳоким маҳалламизда учрашув ўтказганида фарзандим моддий қўллаб-қувватланишга эҳтиёжимиз борлигини айтганида, мурожаатимизни мутасаддилар иштирокида ўрганиб, имконият бўлса, ёрдам беришини айтганди. Куни кеча туман ҳокимлиги томонидан ўғлим Нуриллонинг бир йиллик шартнома пули ўтказиб берилганлигини эшитиб қувондим», — дейди «Ифтихор» маҳалласида яшовчи Феруза Қорақўзиева.
Эслатиб ўтамиз, аввалроқ Қашқадарё вилоятида 10 кун муддатга ҳокимлик вазифасини бажаришга киришган ёш ҳокимлар ҳақида хабар берилиб, Деҳқонободни бошқарган Адҳам Қулмаматовнинг тумандаги заводга бориб, қанча ёшни ишли қилгани билан қизиққани, Яккабоғ ҳокими вазифасини бажарувчи Сетора Эргашева эса унга мурожаат қилган фуқаро билан тортишиб қолиб, «опа, сиз менга ‘понятка’ берманг», дегани, Шаҳрисабз шаҳрининг ёш ҳокими Сабрина Турсунова шаҳардаги «роддом»нинг бир қисми сотилгани ҳақидаги мурожаатни тинглаб, масалага ойдинлик киритгани ҳақида хабар берилганди.
Изоҳ (0)