Sirdaryo tumanida yashovchi Feruza Xidirovaning “Daryo”ga ma’lumot berishicha, tuman tibbiyot birlashmasi tug‘ruq bo‘limida uning endigina tug‘ilgan jiyani tibbiyot xodimlarining noto‘g‘ri ukol qilishi oqibatida vafot etgan. Tuman prokuraturasi holat bo‘yicha jinoyat ishi qo‘zg‘atmagan. Marhum bolaning yaqinlariga ham hech qayerga murojaat qilmaslikni, muammoni hech kimga aytmaslikni maslahat bergan.
So‘nggi paytlarda bizning tumanimizdagi shifoxonada chaqaloqlar o‘limi juda ko‘paydi. Aynan bizda ham shunday bo‘ldi. Mening endigina tug‘ilgan jiyanimga uyga javob berishidan avval onasiga “keling, ukolga olaylik, kechki payt olishi kerak bo‘lgan glyukozasi bor”, deya olib, 2-3 daqiqani ichida qiy-chuv bo‘lib ketadi. Chaqalog‘imizning onasi voqea joyiga borib qaraganda bolaning bir tomoni ko‘m-ko‘k, ikkinchi tomoni esa oqarib ketgan. Nega bunday bo‘ldi desa, biz bilmaymiz, bolangizning o‘zi shunaqa ekan degan. Ukol qildingizmi deganda, hali ukol qilishga ulgurmadik deyishgan. Shundan so‘ng hamshiralar oldiga katta doktorlar yetib kelishgan. Bolaning yuragi to‘xtab qolgan bo‘lgan, deydi Sirdaryodagi “roddom”dan o‘lik chiqqanini aytgan murojaatchi.
Feruza Xidirovaga ko‘ra, doktorlar o‘lik bolani qay holatda topshiraylik deb so‘rashgan.
Doktorlar bizga bolani nima qilaylik olib ketasizlarmi yoki morgga beraylikmi, morgga topshirsak uni tilib, kesib tashlashadi deb judayam qo‘rqinchli gaplarni gapirishdi. Keyin bolani o‘rab, bizga berishdi. Ukamni chaqirsam, u soat o‘n yarimlarda farzandini ko‘rib ketganini, u tirik va yaxshi holatda ekanini aytib, hayron qoldi. Bola qanday qilib bunday qorayib ketadi, bola meniki emas dedi. Shu payt do‘xtirlar bizni bir xonaga olib kirib, uzr kechirasizlar, kechirim so‘raymiz deyishdi. Ukam nega kechirim so‘raysizlar, noto‘g‘ri ukol qilib qo‘ydilaringizmi, faqat to‘g‘risini ayting dedi. Ular yo‘q biz ukol qilmadik deb turib olishdi. Shundan so‘ng o‘lik haqida IIBga xabar berib, bolani ekspertizaga olib ketdik. Ekspertiza xodimlari dastlab, “unday edi, bunday edi”, deya gapirishdi. Keyinchalik esa ham do‘xtirlarning aybi bo‘lgan, noto‘g‘ri ukol qilishgan, bolani shok holatiga olib kelishgan deyishdi. Shundan so‘ng bolani ko‘mib, prokuraturaga borsak, Aziz ismli prokuror qo‘yinglar endi yozuv-chizuv qilmanglar, o‘zim sizlarga yordam beraman deb voqea haqida hech kimga aytmasligimizni maslahat berdi, deydi murojaatchi.
Jiyani o‘limining sababini bilishga urinayotgan ayolning aytishicha, “roddom”dan chiqqan chaqaloq o‘limi bo‘yicha tuman prokuraturasi jinoyat ishi qo‘zg‘atmagan.
Kelinimizni vaqtida operatsiya qilishganida bolasi ham o‘lmasdi. Doktorlarga qayta-qayta aytdim. Kelinimiz oldin ham operatsiya yo‘li bilan tug‘gan. Uni operatsiya qilib, tezroq ko‘zi yorishiga yordam beringlar dedim. Lekin unashmadi. Shifokorlar voqea haqida huquqni muhofaza qiluvchi organlarga ham xabar bermagan ekan. O‘zimiz 102 qilib, voqeadan ularni xabardor qildik. Ammo prokuratura haliyam ishga e’tiborsiz qarayapti, deydi u.
Murojaatchining qo‘shimcha qilishicha, uning jiyani vafotidan so‘ng “roddom”dan yana bir qo‘shnisining farzandi o‘lik holatida chiqqan.
Voqea haqida prokurorga xabar berganimdan so‘ng, u kimlar bilandir gaplashib, “bir haftada beshta o‘lik bo‘ldi, bu roddommi yoki o‘likxonami deya jahl qildi”, deydi murojaatchi ayol.
Avvalroq Bo‘kadagi “roddom”dan ikki o‘lik chiqqani, ona va uning endigina tug‘ilgan qizalog‘i shifokorlar qo‘lida jon bergani xabar berilgandi.
Izoh (0)