Қирғизистон ҳуқуқ-тартибот органлари томонидан маҳаллий кенгашлар сайловида оммавий тартибсизликлар уюштириб, ҳокимиятни ағдармоқчи бўлган гумонланувчилар гуруҳи қўлга олингани ҳақида хабар берилганди.
Қамоққа олинганлар орасида собиқ бош прокурор ўринбосари, адлия генерал майори Қубан Адил ўғли ҳам бор. У гуруҳ молиявий таъминот, ҳуқуқни муҳофаза қилувчи органлар билан алоқа ўрнатиш, уларнинг ҳаракатлари тўғрисида қўлга киритилган маълумотларни етказиш, оммавий тартибсизликлар ва ҳокимиятни эгаллашда вазифаларни тақсимлаш ҳамда мувофиқлаштиришда айбланмоқда.
Бишкек шаҳрининг Биринчи Май туман суди 12 ноябрь куни Қубан Адил ўғлини Қирғизистон Республикаси ИИВ Тергов хизмати терговчисининг илтимосномасига кўра ҳибсга олинганини ва 2025 йил 10 январгача қамоқда сақланишини тасдиқлаган.
Дастлабки маълумотларга кўра, собиқ бош прокурор ўринбосари Қирғизистон Жиноят кодексининг “Оммавий тартибсизликлар”, “Уюшган гуруҳ тузиш ёки унда иштирок этиш”, “Уюшган гуруҳлар ва жиноий уюшмаларни молиялаштириш” ҳамда “Ҳокимиятни зўрлик билан эгаллаш” моддалари бўйича айбланмоқда.
Маълумотларга кўра, Қубан Адил ўғли жорий йилнинг баҳорида президент Садир Жапаровнинг фармойиши билан Табиат ресурслари вазирлиги ҳузуридаги комиссия ишига аралашгани ортидан лавозимидан озод этилган.
Изоҳ (0)