Qirg‘izistonda Milliy xavfsizlik davlat qo‘mitasi (MXDQ) xodimlari tomonidan mashhur kriminal avtoritet Qamchi Kolbayev (Qamchibek Asanbek) qo‘lga olindi, deb yozadi “24.kg”.
16-noyabr kuni Issiqko‘l viloyatida maxsus xizmatlar xodimlari qonundagi o‘g‘ri Qamchibek Asanbek va uning yaqinlari bo‘lgan o‘n kishini qo‘lga oldi. Ular Qirg‘iziston-Xitoy chegarasi yaqinida (Jeti-O‘g‘uz tumani) joylashgan “Bulat-M” ov o‘rmonzoridan qaytib kelayotganida “Qorasoy” chegara punktida ushlangan.
“Tekshiruv chog‘ida ular chegara hududiga Qirg‘iziston Respublikasi davlat organlarining tegishli ruxsatnomalarisiz kelgani aniqlandi. Shu munosabat bilan, Qirg‘iziston qonunchiligiga muvofiq, Q. Asanbek va unga yaqin shaxslarga nisbatan ma’muriy hibs haqida tegishli bayonnomalar rasmiylashtirildi. Shuningdek, tekshiruv natijasida sakkizta o‘tochar qurol aniqlandi”, — deyiladi xabarda.
Qamchi Kolbayev yoki Kolya-qirg‘iz Qirg‘izistonda eng taniqli kriminal avtoritet hisoblanadi. U Issiqko‘l viloyati fuqarosidir.
2011-yil iyunida Kolbayev AQSHda rasman xalqaro narkobiznesning bosh ishtirokchilaridan biri deb tan olingan va mashhur “Birodarlar doirasi” ro‘yxatiga kiritilgan.
AQSH Kolbayev haqidagi ma’lumot uchun 5 million dollar mukofot va’da qilgan
2021-yilda AQSh Davlat departamenti qirg‘izistonlik jinoiy avtoritet Qamchi Kolbayevni hibsga olishga yordam beradigan ma’lumot uchun mukofot miqdorini besh baravar oshirib, 5 million dollarga yetkazgan edi.Davlat departamentining aniqlik kiritishicha, 2000-yilda Kolbayev jinoiy guruh tarkibidagi o‘zining sobiq xo‘jayinini o‘ldirishga urinish va yana ikki kishining o‘limida ayblanib sudlangan. Mazkur jinoyatlar uchun Kolbayev 25 yilga ozodlikdan mahrum qilingan, ammo olti yil o‘tgach, qamoqdan qochib ketgan. 2008-yilda u Moskvada jinoyatchilarning maxfiy yig‘inida jinoiy to‘da boshlig‘i deb e’lon qilingan.
2012-yilda AQSh maxsus xizmatlari Kolbayevni dunyodagi eng yirik narkobaronlar ro‘yxatiga kiritgan. 2017-yilda AQSh hukumati Sobiq Ittifoq mamlakatlaridan o‘n nafar jinoiy avtoritetni “qora ro‘yxat”ga kiritgan, ular orasida Kolbayev ham bor edi. AQSh hududida “qora ro‘yxat”dagi shaxslarning shaxsiy mulklari aniqlangan taqdirda, ular xatlanadi.
AQSh Moliya vazirligi ma’lumotlariga ko‘ra, “Birodarlar doirasi” xalqaro jinoiy guruhiga kiruvchi Kolbayev poraxo‘rlik, odam savdosi va boshqa noqonuniy faoliyatlar bilan shug‘ullangan.
So‘nggi marta Kolbayev 2020-yil 22-oktabrda Bishkek shahrida hibsga olingan. 2021-yil, 24-fevral kuni Bishkek shahrining Pervomayskiy tuman sudi Kolbayevni hibsda saqlash muddatini 22-martgacha uzaytirdi. 2-mart kuni esa Bishkek shahar sudi hay’ati uning qamoqdan qochib ketmasligi bo‘yicha ehtiyot choralarni o‘zgartirdi.
Izoh (0)